اکبریم قوی دولانیم باشوه پروانه کیمین #اکبریه_تقایی_اردبیلی

زبانحال حضرت لیلا (س) به حضرت علی اکبر (ع)
..
..
#سبک_شهریاریمسن_آقا … #سبک_یارالی_جان_یارالی … #سبک_کربلا_منتظر_ماست …
..
..
‌مرحوم تقایی اردبیلی
..
..
اکبریم قوی دولانیم باشوه پروانه کیمین
دوشرم چوللره سندن صورا دیوانه کیمین
..
..
عزم رزم ایلوسن ای شبه رسول مدنی
شمع رخسارووه گیتمه ایله پروانه منی
دالی باخ لیلی دوینجا گوره وجه الحسنی
یانا هجر آتشینه عاشق مستانه کیمین
..
..
شکّرستان لبون لیلینی مجنون ایلیوب
حجر الاسود خالون منی مفتون ایلیوب
آنووی صحبت هجران ایله دلخون ایلیوب
قان دولوبدور دل محزونیمه پیمانه کیمین
..
..
عمر سرمایه سی سن لیلیه ای سرو روان
اولموسان سن بوی آتاندان منه آرامش جان
تیر هجرانه ایدورسن بو یانان قلبی نشان
آیریلورسان نیه مندن بیله بیگانه کیمین
..
..
گوزل آهو ایدوسن ساحت جانانه خرام
بزم عرفاندا ویره ساقی باقی سنه جام
باخورام هر دالی باخدوقجا اورگدن یانورام
توکولور اشک ترون گل یوزه دردانه کیمین
..
..
باغلانوب طرّه طرارووه بو قان اورگیم
شانه مثلینده اولوب هیجریله شان شان اورگیم
ایسته سون دنجله بیر لحظه پریشان اورگیم
چک دالونجا بو یانان قلبیمی میدانه کیمین
..
..
دایان ای سوزلری شیرین یوزی گل لعلی چیچک
گیتمه میش رزمگهه سال باشما قاره لچک
نقش برآب ایلدی نقشه لری چرخ فلک
قلبیده آرزیلاریم قالدیلار افسانه کیمین
..
..
پر آچوب طایر روحون سنون ای روح بلند
عالم قدسده حق محفیلینی ایتدی پسند
بد نظر چوخدی یانان قلبیمی گل ایله سپند
قفس سینه ده قویما اسه ریحانه کیمین
..
..
من دئیدوم قسمت اولار سفره عقدون بزه رم
نو عروسیله گلنده یولووا گل دوزه رم
وای منه سن گیدوسن چوللری ویلان گزه رم
اولار عالم گوزومه گوشه غمخانه کیمین
..
..
دئیه جک دشمن اوغولسوز آنووا گتسه هارا
وویراجاق اهل شماتت بو یانان قلبه یارا
کاش مژگانون اوخی سینمی بیر لحظه یارا
گوره سن قلبیمی شان شاندی اوغول شانه کیمین
..
..
ای زمان یوسفی کی فخر تبار نبوی
دئیمورم گتمه دایان ای گل باغ علوی
دوتموسان ایندی که آیریلماقا تصمیم قوی
گل اوتور قوی دولانم باشووه پروانه کیمین
..
..
ای اولان خالص عزا اهلینه روحانی طبیب
وی «تقایی» کیمی شاعرلره یارا و شکیب
بیر زیارت منه «شهروزیله» سن ایله نصیب
سورونک هر ایکیمیز مرقد جانانه کیمین
..
..
..
#اکبریه #تقایی_اردبیلی #اکبریه_شهادت #ترکی #زبدةالاشعار