عقل بیر نعمت عظمادی وجود بشره #عباسیه_تبسمی

حالات حضرت ابوالفضل علیه السّلام و یکی از کرامات او (روایت عباس آباد هندوستان)
..
..
..
..
حاج ناصر تبسّمی اردبیلی «صفا»
..
..
..
..
عقل بیر نعمت عظمادی وجود بشره
عاقل انسانلاری مشکل سالا شیطان خطره
ساتماز هئچ قیمته جانا عُقلا خیری شره
یتیرن عقلدی ناپخته ضمیری ثمره
فکر سالم ائدر هر مؤمنی نائل ظفره
..
..
..
..
نفس امّاره نی قویما تاپا نفسه غلبه
واجباته چالیش آلّانما فقط مستحبه
ترسه قویما باشوا بورکوی واهی سببه
اولماز هئچ کیمسه اروپائی او بیهوده دبه
باخ شناسناموه ملّیتوی آل نظره
..
..
..
..
معظل جامعه دن بحث ائله ای رطب لسان
بالغ اوغلانلار ائدور زینت اوزین مثل زنان
اوزادور زلفینی باغلور دُم اسبی دالیدان
فکر ائدور اوج کمالاتده ایلور جولان
غافل از اینکه ویرور تیشه کمال بشره
..
..
..
..
سوء تعبیر ائلمز شعریمه حتماً عُقلا
شهدا قانینه رجحان واری کلک اُدبا
بویوروب شخص ائمه بو کلامی رُفقا
اودی لازمدی قلم دوز یازا صادق دانشا
عاشقم منده بئله صاحب کلک و اثره
..
..
..
..
نه گوزلدی اولا انسانلاری دنیاده بصیر
دوز عبادت ائلیه حقّه کبیریله صغیر
نعمت ارزانی ائدر خلقه خداوند کبیر
نه گرانی نه گرفتاری ائدر خلقی اسیر
زندگی راحت اولار امّت عالی سیَره
..
..
..
..
اوتوز ایلدن چوخ اولار نوحه نصایح یازارام
اوزومی عترت پیغمبره مادح یازارام
صالحی صالحه طالحلری طالح یازارام
کیمی تقوالی گورم فاضل و فاتح یازارام
پولا خاطر باشیمی اگمه میشم شیر نره
..
..
..
..
ایندی آماده دی خامم یازا بیر عالی خبر
آغلیاق توشۀ محشر اولا تا اشک بصر
گوزیاشی نامۀ اعمالوی غفرانه بزر
دولانار حبل متینه سنی رضوانه چکر
آغلیور مهدی زهراده شبیر و شبره
..
..
..
..
یا خانم فاطمه ای سیّدۀ پاک نهاد
سن کمک ایله اولا روح روانیم ارشاد
لطف سرشاروه قربان اولوم آی کنز وِداد
سن بویور منده یازیم خانۀ احسان آباد
فخر ائدیم قوی سنون آدونله هامی نوحه گره
..
..
..
..
کشور هند کی مشهوردی بیر کشور شاد
واردی بیر شیعه نشین شهری آدی عبّاس آباد
هر ایل ایّام محرّمده او شهر ایچره عِباد
گینوب قاره حسین وای دیور هر پاک نژاد
وا حسین وای اوجالور عرشده شمس و قمره
..
..
..
..
رسمدی اوردادا ایران کیمی ایّام عزا
تعزیه خوانی اولار شیعه گیور جمله قرا
قورولار معرکه میدان آچیلار یوم بلا
کیم حسینیدی ویرار باشه اولار نوحه سرا
احسن اوردا یاشیان امّت شوردیده سره
..
..
..
..
نقل ائدور راوی بیر ئیل طبق رسوم سنوات
دهم ماه محرّمدی مرتّب هیئات
تعزیه ایلسون اجرا دوزلیبدور نفرات
ولی عبّاس اولا بیر کیمسه گزوردی حضرات
اولدی معطوف غرض ذهنلری بیر نفره
..
..
..
..
بیر جوانیدی کمال اهلی اوزی نیک سجا
قد اوجا انلی کورک گوزلر ئیری ماه لقا
اوزی مسلم آتاسی ناصبی ضدّ ولا
قورتاریب تعزیه بیلدی بو قضایانی آتا
پوزولوب حالی ویرور باشینی دیواره دره
..
..
..
..
دانیشور اوز اوزینه یاره لیور دل دوداقین
منتظردی گله اوغلان کسه قهراً قاباقین
تیز ائدیب اوغلونا بی دین آتا قلباً اوراقین
آناسیندان دوتور هر دم او جوانین سراقین
ناگهان گلدی اوغول ساخلادی حرمت پدره
..
..
..
..
آتا بی چون و چرا سسلدی اوغلین بو قرار
سن بو گون ناصبی لر ایچره ائدیبسن منی خوار
به علاوه ایلیوبسن آتوی درده دچار
بو علاقه سنی هاردان ائلیوب سویله شکار
کیمدی عبّاس سالیبدور سنی دام ظفره
..
..
..
..
آتاسی بیرده سؤال ایلدی ای عاشق آل
دوز دیورسن اگر عبّاسه وارون شوق وصال
وئر کسیم قولّارون اولسون قلم عبّاسه مثال
گئت شفا قولّاروا سودگون عبّاسدن آل
کس دئدی قولّاریمی سال یره عشقیم گُوَره
..
..
..
..
عاشقم من دئدی بو عشقیمه چوخ مفتخرم
قول ندی گوز ندی باشدان اونا خاطر کئچرم
منه عبّاس آقا نوکر دیه حسرت چکرم
هاردا گلسه آدی قانیاش ایکی گوزدن توکرم
یوخ غمیم باشیمی وئرسون دم کسگین کسره
..
..
..
..
تانمیدی نچون عبّاسی او مرتدّ زمان
بیر تبر گوتدی وئره کینه سین عبّاسه نشان
اللرین قطع ائدیب اوز اوغلینون اول بی ایمان
ننه سی گلدی گوروب حالی سالیب آه و فغان
لعنت اولسون دئدی سن تک پدر خیره سره
..
..
..
..
دئدی احسن کیشی یاخجی ایلدون دِینون ادا
بالامون قولّارینی کسدون الون آغریمیا
طوی ائدیب اوغلیما یاخدون الوه قانلی حنا
گوروم عبّاس جوابون وئره آی کینه فزا
اونون آقاسی قصاص ایلیه سن فتنه گره
..
..
..
..
عورتین طعنه سی تأثیر ایلدی شوهرینه
دئدی سالّام سنیده دیلدن اوغول کیفرینه
دیه سن سنده وئریبسن دل اونون دلبرینه
دئدی جانیم اولا قربان بالامون رهبرینه
صرف اولوب عمریمی افسوس اولا قوم کفره
..
..
..
..
او منافق کیشی صرصر کیمی غیضیندن اسیب
بینوا همسرینون دوتدی دیلین فوری کسیب
آتدی ائودن ایکسینده چوله بی یار و غریب
لطف عبّاسه ائدیب تکیه ایکی یار نجیب
گَل دیورلر آقا یار اول ایکی بی بال و پره
..
..
..
..
کهنه مسجدده گلیب دوتدیلا زحمتله قرار
باش باشا وئردی ایکی یاره لی دلخسته نزار
آی اباالفضل یتیش داده دیوب آغلادیلار
اوتوروب بیر بیرینون یاره لرین باغلادیلار
بخت یار اولدی نئجه گور او ایکی بخته وره
..
..
..
..
آغلیوب آغلیوب القصّه گئدیبلر یوخیا
گوردی اوغلان یوخیدا دورد نفر انوار هُدا
گلدیلر هالۀ نور ایچره او مردان خدا
حسنینیدی اباالفضل علی شاه ولا
پرس و جو اولدیلار احوال لرین بو خبره
..
..
..
..
شرح ائدیب ماوقعی عاشق محصور نوا
بویوروب حضرت اونا غم یمه آی غرق بلا
بیر دعا قیلدی علی قولّار او دم تاپدی شفا
آنانوندا دیلینه فاطمه ایلوبدی دوا
صدق دیل گور نه چکور شخصی صفای سحره
..
..
..
..
احتیاجون وار اگر سنده گَل عبّاسه دخیل
بیر شفاخانه سی وار یوخ اونا مانند و بدیل
ایکی قول بیر گوزینه خاطر آلیب اجر جزیل
عبد صالح لقبین وئردی اونا ربّ جلیل
گونده هر شیعه سلام عرض ایلیور بش فقره
..
..
..
..
چوخ گوزل عهدینه ایفا ایلدی پور علی
پاک اورکلرده آدی حشره کیمین قالدی جلی
تا قیامت گله حاشا بو شهیدون مثلی
بویوروب ختم رسولان خدای ازلی
مجری حکم امام اولدی یتیشدی ثمره
..
..
..
..
تا جهاد امرینه اذن آلدی علمدار شهید
چگنینه مشکی سالیب حامی سلطان وحید
تلسوردی گیه اکبر مثلی رخت شهید
یازا تقدیس آدینا صاحب قرآن مجید
یاره دگدوکجه فرح گتدی جوان قَدره
..
..
..
..
واقفیدی اوزی عبّاس گرک قانه باتا
اکبر و قاسملن یان یانا میداندا یاتا
ایکی قول بیر گوزی قربان وئره دنیانی آتا
تا شفاعت گونی زهرا بویوک آماله چاتا
جهد ائدوردی گینه سو حمل ایلیه خیمه لره
..
..
..
..
سو کنارینده ایکی قولّارینی سالدی عدو
باخدی سو مشکینه گوردی هله وار مشکده سو
ایستدی خیمیه ساری گینه ده دوندره رو
گلدی بیر تیر عداوتله دگوب سیندی سبو
دئدی ایوای اخی سود اولدی مبدّل ضرره
..
..
..
..
نا امید اولدی عقابین اوتوروب اوز باشینا
آغلادی گاه سوسوز قزلارا گه قارداشینا
بیر عمود آهن انیب اوندا نه گوردی باشینا
باشینون قانی قاریشدی آقامون گوزیاشینا
دوشدی آتدان یره ال یوخ ائده تکیه سپره
..
..
..
..
اللی لر السیز اباالفضلی آلیبلار آریا
نیزه شمشیر ویرولّار یارا اوستن یاریا
صبر ائدون سویلیور عبّاس باخون بیر تاریا
شه قباقینده کسون من قاچا بیلّم هاریا
باش وئرم فخردی سلطان قتیل العبره
..
..
..
..
گوزی یولدا نگرانیدی گزور چاره یولی
دشمن ایلوردی شماتت یوخیدی تنده قولی
بیر گوزینده اوتوروب اوخ بیری قانیله دولی
داغلیب باش گوزی گورمور گلنی صاقی صولی
دیور هر دم آقا امداد ائله بو خونجگره
..
..
..
..
فانی دنیاده نه خوش اولدی یتیشدیم هدفه
چاتدیم اکبر مثلی منده جلال شرفه
گل گوزوم سیل گوروشک دوز شهدا ایچره صفه
قوناقام بو گئجه فردوسده شاه نجفه
ایلرم فخر بو گون مرتبۀ معتبره
..
..
..
..
با خبر ایلمه دیداریمه گلسون بالالار
دگولم راضی او قزلار اورگی قان اولالار
شعلۀ نار مصیباتده گل تک سولالار
باشیم اوستونده عمو وای سؤلیوب باش یولالار
گوره قولسوز منی مشکلدی بنات صغره
..
..
..
..
گلسه جام الده رقیّه اونا واردی نه سؤزوم
وئرمیشم من اونا سو قولی گلن لحظه اوزوم
کاش دای گورمیه سولموش یوزونی قانلی گوزوم
یوخدی بو حالیله شرمندلیگه منده دؤزوم
سوئی مشکل اَله گتدیم ولی گئتدی هدره
..
..
..
..
اللریم گئتدی گینه سعی ائلدیم اوز ایشیمه
مشکی چوخ زحمتله منتقل ائتدیم دیشیمه
نیّتیم خیردی فکر ائتمدیم آسایشیمه
اصغرین تشنه لیگی اود ویریب آرامشیمه
حیف اولا تیر رجا دگدی بدادن حجره
..
..
..
..
ای ابوالفضل وفا کانی مه مُلک سخا
صرف اولوب عمر گرانمایه می عشقونده آقا
فخر ائدور عشقوزه بو شاعر کم مایه «صفا»
وار امیدیم منه امداد ائده سن یوم جزا
سایوه دالدالانام دوشمیه جانیم خطره
..
..
..
..