خرابه و زبانحال حضرت رقیه (س)
.
✍️ زبدة الاشعار ✍️
.
🆔: @nohe_torki
.
مرحوم سعدی زمان
.
مکان خرابه نی چون آل بوتراب ایلدی
حصار صبرلرین گوزیاشی خراب ایلدی
.
هره قویوب باشینی بیر طرفده غم دیزینه
اورکلرینده کی غم گوزلرین پرآب ایلدی
.
دینمورم نه خرابه بو قدر وار بولورم
ایلان ووران کیمی اطفال پیچ و تاب ایلدی
.
گلوب خرابیه اهل جفا تماشایه
شماتت عترت اطهاره شیخ و شاب ایلدی
.
گلن وراردی خواتین نازه دل یاراسی
اورکلرونده اولان سوزش التهاب ایلدی
.
بیری شماتتیله خوردا قیزلارا گولدی
اوزینی لایق قهر حق و عذاب ایلدی
.
بیری ترحم ایدوب گوزلرینی دولدوردی
بیریسی خوش دلیله دیندیروب ثواب ایلدی
.
جگر یارالی ایاقلار قابار خانم بالالار
سوسوزلوق آجلیقا نه زحمتیله تاب ایلدی
.
حیالی عمه لرون یا بقیه الاخیار
کنیز روم و حبش شامیان حساب ایلدی
.
مخدرات بنی هاشم آج سوسوز یورقون
لحاف پرتو خور بسترین تراب ایلدی
.
بلا چولنده سویولموش تالانمش آل الله
جمال عصمته اوز ساچلارین نقاب ایلدی
.
واریدی هر بیرینون بیرجه کهنه پیرهنی
اوندا شامده پوسیده آفتاب ایلدی
.
یزید تختده ویرانه ده امام علیل؟
فلک معاویه اوغلون نه کامیاب ایلدی
.
ایله ساراتدی خانم قیزلاری تهاجم جوع
هامیسنون یوزونی مثل ماهتاب ایلدی
.
دیردی دردینی هر تک تکی علی قیزینا
خصوص نازلی رقیه اونی کباب ایلدی
.
زبسکه دل دیدی دلدن دوشوب گیدوب هوشه
بیر آز علی قیزینون مثل بختی خواب ایلدی
.
گلوب خرابیه گوردی آتاسی رویاده
بیان شکویه فی الفور فتح باب ایلدی
.
دیدی گوزوندن ایراق گور بابا نحالدیم
نه ظلملر بیزه گور قوم کین مآب ایلدی
.
باشون دالنجا دوشوب شامه باش آچوخ گلدیم
دایاندیم اهل جفا هر قدر عتاب ایلدی
.
او قدر خار مغیلان باتوب ایاقلاریما
قضا ایاقلاریمی قانیله خضاب ایلدی
.
دعا ایدردیم اوزون بیر گوروب اولردیم من
دعامی – یاخشی خداوند مستجاب ایلدی
.
آچوب قولونی آتا بوینونا خانم سالسون
امیدی یاسه اجل پیکی انتخاب ایلدی
.
دوشوب قولی یاننا اولدی خوابدن بیدار
بلالی زینبه یوز دوندروب خطاب ایلدی
.
آتام خرابیه گلمشدی عمه جان ایمدی
نیه مصاحبتمدن بس اجتناب ایلدی
.
نقدر دل دیدیلر اولمادی بالا آرام
اوزون ووروب یره فریاد و اضطراب ایلدی
.
ویروبله سس سسه آغلاشدیلار مخدره لر
گوزینی هر بیری بارنده بیر سحاب ایلدی
.
ایشیتدی ناله سسین خوابدن اویاندی یزید
نه وار سوروشدی ندیمی اونا جواب ایلدی
.
دیدی آتاسینی ایستور خرابه ده بیر قیز
نه شرم ایدوب او زنا زاده نه حجاب ایلدی
.
خیال ایدوب خانمی بلکه غصه مرگ ایلسون
تسلس ویرماقا بیر ظلمه ارتکاب ایلدی
.
آتاسینون دیدی باشین خرابیه آپارون
پیمبر عترتنی تازه دن مصاب ایلدی
.
بالا آتا باشینی آلدی باسدی آغوشه
فغان و ناله و فریاد چون رباب ایلدی
.
دیدی بابا قولیمی ایپ کسوبدی چوخ اینجیر
سنان و شمر بیزی بسته طناب ایلدی
.
بو دللریله بیانه گتوردی درد دلین
بوشاتماقا دل پردردینی شتاب ایلدی
.
بابا اسیره قیزون یاخشی سرفراز ایلدون
گلوب بو آخر عمریمده کشف راز ایلدون
.
قیزون خرابه ده بولدون ئولور اودور گلدون
رضای حقدن اوتور فکرت نماز ایلدون
.
گرک کفن گتوریدون ندن گتورمموسن؟
حقیقی عشقمی تشبیه بر مجاز ایلدون
.
روادی سن گله سن ؛ جان نثار ایلمیم
یادیمدادور نقدر نازیمه نیاز ایلدون
.
اورک دولیدی دلیم باغلی درد دل دیماقا
شکایت ایتماقا بیر باب نطق باز ایلدون
.
محبتون منه چوخدور ولی گلایم وار
که قطع لطفوی بیر مدت دراز ایلدون
.
گلنده باشوی یولدا نقدر دیندیردیم
دانشمادون منه نوک جداده ناز ایلدون
.
گیرنده شامه ولی گوردون آز قالور که الم
تسلی دلیمی نغمه حجاز ایلدون
.
باشوا من دولانوم بس ندن باشون کسیلوب
وجود ملکنی بالمره ترک و تاز ایلدون
.
یتیمه قیزلار ایچینده بو نصف شبده بابا
بو گلماقون منه اسباب امتیاز ایلدون
.
خرابه دن بابا یا گیتمه یا آپار منیده
بوقدر بسدی گرفتار سوز و ساز ایلدون
.
آپارماسان منی السمده قویمارام گیده سن
منی بو جرئته لطفیله سن مجاز ایلدون
.
گوزوندن ای بابا بیر گون کناره قویمازدون
سبب نه اولدی بو بیکسدن احتراز ایلدون
.
بو مدتی دیموسن سوگلی قیزیم هانی بس
محبتون چوخودی نولدی علت آز ایلدون
.
(حسینی) لیله میلاد احمد محمود
حسین فاطمیه خدمت ایاز ایلدون
.
چکلدی نظمه بو سوز منزل شفیعیده
او نوحه خوانی بو خدمتده سرفراز ایلدون
.
.
.
#خرابه_شام
#حضرت_رقیه_شهادت
#سعدی_زمان
#مکان_خرابه_نی_چون_آل_بوتراب_ایلدی
#بابا_اسیره_قیزون_یاخشی_سرفراز_ایلدون
#کنزالحسینی2 ص 272
#ترکی
.
✍️ #زبدةالاشعار ✍️
.
🆔: @nohe_torki
نظر دهید