زبدةالاشعار

ویرانه ده بیر مدت اگلشدی آی اولدوزلار #اعظمی_تبریزی

حالات خرابه شام
.
✍️ زبدة الاشعار ✍️
.
?: @nohe_torki
.
مرحوم اعظمی تبریزی
.
ویرانه ده بیر مدت اگلشدی آی اولدوزلار
باش قویدی تراب اوسته گل اوزلی بالا قیزلار
.
.
هر تک تکی اوز عشقین دنیایه نشان ویردی
بیر نازلی بالا آخر ویرانه ده جان ویردی
.
.
هر چند او مظلومه آی تک دل شب باتدی
ترک ایلدی دنیانی اوز مقصدینه چاتدی
اما غم و اندوهی آل اللهی آغلاتدی
وای نازلی رقیّم وای دللرده اولوب ازبَر
افسوس او گون اولموب قارداشی علی اکبر
.
.
بیر شمع کیمی سوندی آهیله اولان مأنوس
گل سولدی گلستاندا بلبلر اولوب مأیوس
سسلندی در و دیوار بو غنچه گله افسوس
دلبند حسین دور بو عالملر ایدر رشگین
ضبط ایلدی ویرانه رخساره آخان اشگین
.
.
ویرانه دیله گلدی ای غنچه نه تئز سولدون
هر چند گجه گوندوز بو یرده غمه دولدون
اما غم ومحنتدن عالمده خلاص اولدون
گتدون دیمورم چخدی بو یرده الیم سندن
حشره کیمی عطردن تک نالن گله جاق مندن
.
.
تشکیل محن قوردی آل الله اودم ناگاه
اصغر آناسی دلدن اودلاندی چکوبدور آه
سسلندی مصیبدن قورتولدی بالام الله
شام اهلی بونا چوخلی دل یاره سی ورموشدی
ایستردی الوم بسکه غمللر ایله یورموشدی
.
.
زهرا قیزی چوخ یاندی اوج ایتدی گویه آهی
عرض ایتدی یتش داده ای کرب و بلا شاهی
وی ظلمیله دین اوسته تالانه گیدن جاهی
جان ویردی رقین گل، گل قبلیه سن دوندر
گر اولماسا گلماقون گور اولسا کفن گوندر
.
.
زینب دوتاجاق ماتم سولموش بو گل یاسه
بیر دادرسیم یوخدور نسگل اولا عباسه
بو یرده غریبم من کیمدور گلنیم یاسه
خواراولسا بالام یاسی بیگانه ولایتده
قالام گجه گوندوز من خلق ایچره شماتتده
.
.
بو طفلی یاتوردار دیم نازیله دیز اوستنده
عمریم نه قدر اولسا یانام بو سوز اوستنده
شهزاده نی ساخلالار علمده گوز اوستنده
هر کیمسه عزیزین گر خوار ایستیه خوار اولسون
شهزادیه ویرانه شام اهلینه عار اولسون
.
.
هر جورو جفایتدی طاقت بو بالا گتدی
بو چرخ جفا پرور باشه نه بلا گتدی
بو گوهر شب تابی هاردان هارا گور گتدی
ویران اولاسان دنیا بو یثرب عزیزیدی
اولده بونون هنده یثربده کنیز یدی
.
.
ای چرخ جفا گستر انصافیدی دنیاده
شهزاده یاتا یرده بسترده گدازاده
بو ظلم و ستم قالسون اول محکمه داده
گر کامه یته قویماز حق ظالم و گمراهی
یرده بلورم قالماز مظلوم بالامون آهی
.
.
غارتده چون اطفالین یانمیشدی پر و بالی
زیر پریمه یغدیم قوش تک یانان اطفالی
ویرانه پناه گتدیم کیم غمدن اولار خالی
بو بیر سوری آهودن آیریلدی بیری الله
نیلوم گجه یانیمده گورسنسه یری الله
.
.
قالدی بالالار بلمم اول دمده نه احواله
گلدی اوگوزل طفلین غسلین ویره غساله
باشلاندی بیر هنگامه عرشه اوجالوب ناله
تا کوینگین اگنندن غساله سویوندوردی
نیلی قولی گورسندی دنیایه شرروردی
.
.
حسرتلی الن بیر قیز صاق و صولوتی گوزلر
غساله بلور حالین نیلی قولونی گوزلر
مهماندی گیدیر بلدی اکبر یولونی گوزلر
اما غمی آغلاتدی تا عالم ناسوتی
بیر پاره تختیدی یاخشتیدی تابوتی
.
.
حسرتله حیا دُرون جمع ایتدیله گنج اوسته
گویا قیزل گلدور دوشموش یره بیر دسته
پوزدی هامونون حالین اول اکبره وابسته
زینب او شیرین دلدن بلمم نجه ال اوزدی
اطرافنه اول شمعین پروانه لری دوزدی
.
.
برگ اوسته دوشوب غنچه بو حاله یانوب ایللر
دریا کیمی موج ایتدی گوزلردن آخان سیللر
غساله سوئی توکدی ایسلاندی قرا تللر
زلفی داغلوب تل تل رخساره او ناکامین
آخدوقجا سو زلفندن یازدی یوزه آلامین
.
.
ایتمیشدی غبار آلود ویرانه رخ زردین
تا آب روان آخدی سیلدی یوزینون گردین
سولموش یوزی گورسندی اعلان ایلدی دردین
هرکیم بوغمی گوردی اوزغملرینی آتدی
سیلی یری گل یوزده غساله نی آغلاتدی
.
.
کلثومه دیدی زینب آغلا باجی جان آغلا
ایوای بالا وای سویله آهیله جگر داغلا
من قالزدوم آهسته سن گوزلرینی باغلا
قبر اوستنه یازدورام بلسون بو غمی زوار
الموب بو بالا یعنی الدوردی بونی اشرار
.
.
چوخ نسگلی وار دلده بیکسدی وطن سیزدی
دنیانی پوزار حالی بیر گلدی چمن سیزدی
بوباب الحوایجدی هر چند کفن سیزدی
قویام یاننا تربت گلسون بو بالا عطری
بو تربت حسینوندور وار کرب و بلا عطری
.
.
دنیایه محن یتدی بو غملی حکایتدن
باغلاندی اوگوزلر که آغلاردی خجالتدن
اولدی اورکی ساکت قورتولدی شماتتدن
ناله کسلر آخر ویرانه دن هر ساعت
فریاد ایلین گتدی هند اوغلی یاتا راحت
.
.
تا وقت او وقت اولدی گل گلشنی ترک ایتسون
قمچی یاراسی قولدا زهرایه قوناق گتسون
جنتده او عالیله وصل عالمینه یتسون
ظلمیله الن مظلوم یولداشلارینی گورسون
چو خداندی یانوب هجره قارداشلارینی گورسون
.
.
آل اللهی یاندوردی بو حال اسف انگیز
اول داغلی اورک لرده جام غم اولوب لب ریز
اطفاله دیدی زینب اولماز بله غم هرگز
نی تک ایلیون ناله هنگام فراقوز دی
بو نازلی بالا بوردا بیر لحظه قونا قوزدی
.
.
زینبده دی بو محنت سالسون شرر آفاقه
تا بوکدوله الوان تک اول غنچه نی یپراقه
غملراریدن جسمین تاپشور دولا توپراقه
معناده مزارینده سس گلدی رقیم گل
غملر سنی چوخ یوردی یورقون بالا یات دینجل
.
.
ویرانه ده دفن اولدی گل اوزلی او مه پاره
مه اوستنی ابر اورتدی قبره چکلوب قاره
قبرینده اوپوب زینب تا یول آچا زواره
اکبر باجیسی گورنه عز و شرفه یتدی
بیر خورداجا قبریله ویرانی بهشت ایتدی
.
.
حق باطله غالب دور گور سوز یرینه یتدی
نولدی او اوجا قصری هند اوغلی هارا گتدی
اما بو آتا سیز قیز دللره نفوس ایتدی
سلطانیدی دنیایه هند اوغلی اولوب فانی
بو طفل اسیر ییدی دوتدی آدی دنیانی
.
.
تاریخه ایدوب زینب منشی وفا صبرین
دولدورسون عزا داری قان یاشیله گوز ابرین
گوز یاشلی دولانسون تا تاپسون بالاجا قبرین
سیلسون گورینون یاشی قبر اوسته اولان گردین
درمانین عطا ایلر هرکیمسه دیسه دردین
.
.
هر محنته دین اوسته هر چند رضا ویردی
دنیایه اوگون اما اعلان عزا ویردی
ویرانه ده خوار اولدی شاماته صفا ویردی
قبری ویرری اعلان اوز حقنین اثباتین
گر اولماسا اول مدفن یوخ ارزشی شاماتین
.
.
#خرابه_شام
#حضرت_رقیه_شهادت
#ویرانه_ده_بیر_مدت_اگلشدی_آی_الدوزلار
#اعظمی_تبریزی
#ترکی
.
✍️ #زبدةالاشعار ✍️
.
?: @nohe_torki

متن پیشنهادی:  بُلورسن اوج عصمتون هماسیم عم اوغلی جان #فاطمیه_طاهری

نظر

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی