شجاعت حضرت ابوالفضل (ع)
.
.
احمدیان خسروشاهی
.
.
ای جماعت یادگار ساقی کوثر منم
شیر یزداندور آتام عباس نام آور منم
.
.
مرتضی فرزندیَم چرخ شجاعتده مهم
حجت الهدور آتام احکام دینه آگهم
منصبیم سقّادی اما نوکر شاهنشهم
شهرتیم وار مرتضایه جنگده مظهر منم
.
.
گر اله شمشیر آلام ای لشکر کینه سیر
قویمارام قالسون سلامت بیر نفر صاحب هنر
ایله نابود ایلرم دوشمز نظامه دسته لر
بو ایشه وار قدرتیم بیر سینمیان سنگر منم
.
.
جنگه اقدام ایلسم ای لشکر بی ننگ و عار
ضرب شمشیریله قیلّام بو نظامی تار مار
ارتش ایچره زنده قالماز افسران نامدار
قابض الأرواح قوم لشکر کافر منم
.
.
دوتسا گر دنیانی لشکر ذرّه جه باک ائتمرم
آلماسام سو دست خالی خیمه گاهه گئتمرم
تشنه لر سو ایچمه سه دلده مرامه یتمرم
عترت پیغمبری سیراب ائدن یکسر منم
.
.
وئردی بو مشکی سکینه خیمه دن سالدى یولا
نه روادور تشنه لیقدان گل کیمی یوزلر سولا
یا گرک سو اخذ ائدم یا مشک آبه قان دولا
ساقی ذرّیّه ی پیغمبر اطهر منم
.
.
من گلنده وعده وئردیم تشنه لب اطفاله سو
اسم سقّایه سودور دنیاده یاخشی آبرو
اولماسا سو ای جماعت ایلرم مرگ آرزو
یوخ ئولومدن باکیم اصلا زاده ی حیدر منم
.
.
ایلدی اتمام حجت آلدى شمشیرین اله
ائتدی حمله شیر تک سالدی سپاهه ولوله
صفلری پوزدی داغیتدی دوندی آهی مشعله
سویله دی «اُردوی شاه دینه سرلشکر منم»
.
.
ضرب شصتیله فراته فوراً آچدی راه عشق
پرچمین نهر اوسته ووردی سر سپاه شاه عشق
دولدوروب اوجین سودان اولدی او دم آگاه عشق
سویله دی ای نفس! خوار اول سن، وفا پرور منم
.
.
آتدی اوجوندان سویی رسم وفادن گئچمدی
جانینی جان علىّ المرتضادن سئچمدی
چیخدی دریادن سوسوز اول باوفا سو ایچمدی
چون یقین ائتدی حسین شه دور اونا نوکر منم
.
.
«احمدیان» بسدی یازما شرح غم ائتمه رقم
ایلمه منظور خلقی، صدق دلدن وور قلم
هرنه مشکل امرون اولسا حل ائدر صاحب علم
گوز یاشیله یاز عریضه عرض قیل مضطر منم
.
.
#عباسیه #احمدیان_خسروشاهی #عباسیه_شجاعت #ترکی #زبدةالاشعار
نظر دهید