زبدةالاشعار

چوخ شخص وار که شهرتی رحمان عصردی #کوچ_کربلا_شاهی_اردبیلی

پندیات
گریز به عاشورا و کوچ از کربلا
.
.
شاهی اردبیلی
.
.
چوخ شخص وار که شهرتی رحمان عصردی
باخسون اگر حسابینه شیطان عصردی
.
چوخ شخص واردی باد هوادور قازاندیقی
بیچاره فکر ایدور که سلیمان عصردی
.
چوخلار قازیب درین قویی اوز قارداشین سالار
قرآندان اورگنن بونو اخوان عصردی
.
ناز ایتمه ای بولوط سنه ده یوخدور احتیاج
چوخ گوز منیم گوزوم کیمی گریان عصردی
.
وجدان آدینلی گوهرینی حفظ ایدن فقیر
درویش عصر اولسادا سلطان عصردی
.
کیم یولج النهاره اولوب آشنا بیلر
ایوان قصر سایه زندان عصردی
.
عصرین الیله اولمالیدور خاکه سرنگون
هر مرد که سواره میدان عصردی
.
نقال نغز گودن ایشیتدیم دیوردی که
رستمده سوزدی قصه دستان عصردی
.
شاهی نه بی جهت الیور دانه دانه اشک
مرجان اکیر بو اولکه ده دهقان عصردی
.
ای عقل چوخدا ایلمه ایراد منطقه
اول بینواده سن کیمی حیران عصردی
.
بیلمم ندن پوزولمادی نظم ونظام عصر
امت الیله قانه باتاندا امام عصر
.
#عاشورا
.
قیلدی نماز وحشی عرب چکدی خنجرین
روح نمازی یخدی یره کسدی حنجرین
.
گورستدی صحنه بعثره ما فی القبوردن
یوزمین نبی نین آچدی قضا قبر اطهرین
.
کیم دوردی قبردن قویوب اوز سوی مقتله
جمع اولدیلار حضورینه سردار بی سرین
.
اقرأ بیوردی حضرت داووده ذات هو
یعنی که باشلا نوحه سینی شاه محشرین
.
باشلاندی نوحه بنده بله ایلورم گمان
سوز یحیوینین اولدی او دم سس پیمبرین
.
دولدی نوای دلکش عشاقیلن عراق
یعنی اوجالدی ناله سی یوزمین پیمبرین
.
ترک ائتدی حیف زینب او جانانه مجلسی
چکدی اونی خیامه طرف ظلمی لشگرین
.
اصحاب دین سرادق یاسینه ویردی اود
آتش داغیتدی چوللره قران ورقلرین
.
من اولمادیم او چولده یازام کیپریگیمله شعر
کیپریک یرینه یازدی تیکان شعر بی قرین
.
بیر حرفینه یتیشمز او شعرین قسم به عرش
دوققوز کتابی منزوینین یا که انورین
.
مین ایلدور آسماندا دیور دم به دم سروش
اول شعر ثبت اولونموش ایاقلاره آفرین
.
تاپدی او چولده خاتمه بیر فصل حشردن
شامین یولوندا باشلادیلار فصل دیگرین
.
صحرا او فصله خیره اولوب داشلار آغلادی
باخدی جداده بیر بیرینه باشلار آغلادی
.
#کوچ_کربلا
.
تپراقه لمعه لمعه انیب استعاره لر
تا طمطراقیله یولا دوشسون ستاره لر
.
امن یجیب دیلده سوار اولدی ناقیه
نور محمد ایسی وئرن ماهپاره لر
.
تا وصف ائده او طفللرین شأن وشوکتین
،،شاهی،،سوزین آذانلارا سالدی مناره لر
.
شربت گتیردی ساقی عرفان سپهردن
ایچدی قدح قدح او سوسوز نور خواره لر
.
سس گلدی عرشدن نچه یول ای بو قیزلارین
زیب و زرین سویوب آپاران بد قواره لر
.
اولدوز توکوب قباقینه صراف آسمان
ائیلور درست او طفل لره گوشواره لر
.
شامین یولوندا عدنه گئدن یئل لر اونلارین
زلفون آچوب هواده ائدور استخاره لر
.
طوفان سوروشدی کیمدی صلابت معلمی
داغلار او خیردا قیزلارا قیلدی اشاره لر
.
بو صبرو صولتیله باخاندا جدالره
نی لر کیمی نوا ائدر اول قلبی یاره لر
.
فورا وئرور او ناله لره قمچی لر جواب
یئل لر گلیب دیله دیور ای بختی قاره لر
.
ساکت اولون وگر نه ویریب ئولدورر سیزی
بو تازه کارباره چاتان هیچ کاره لر
.
جسمینده بونلارین نه خرد ایشلیور نه رحم
ایشلر فقط یالان دانیشان آرواره لر
.
بونلار گدادیلر که چاتیبلار صدارته
بونلار قان ائیلیینده قورار جشنواره لر
.
بونلار گلوی بلبله پیکان ویراندیلار
بونلار کبوترین قانادین سیندیراندیلار
.
#پندیات
#قتلگاه
#کوچ_کربلا #شاهی_اردبیلی
#چوخ_شخص_وار_که_شهرتی_رحمان_عصردی
#ترکی
#زبدةالاشعار

متن پیشنهادی:  منم آل بو ترابه بولوسن عزیز ای عمّه #مجلس_یزید #تائب_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی