ای قلم زینت ائله دفتره بسم اللهی – #حسینیه_احسان_بدرخانی

معجزه امام حسین (ع)
.
✍️ زبدة الاشعار ✍️

?: @nohe_torki
.
احسان بدرخانی
.
ای قلم زینت ائله دفتره بسم اللهی
سعی ائله بوشلاما بودهریده حبل اللهی
.
.
ائتمه مظلومه ستم صاحب قدرت سن اگر
حفظ ائله وحدتیوی قائل وحدت سن اگر
دوت حسین دامنینی طالب جنّت سن اگر
او شهین قدرتین اعلان ائله بیگانه لره
قویما ایراد ائده بیر عده عزاخانه لره
.
.
بیرحکایت یازورام دفتره روشندی هدف
مثل آئینه دی انسانلارا تاریخ سلف
کیم او مرآته باخا سیر ائدر اللهه طرف
عین تاریخیدی بو سوزلریمون هر بندی
ائدوب (اسرار شهادتده) بیان (دربندی)
.
.
بیر نفر هندیده چوخ صاحب شخصیتیدی
صاحب بذل و کرم صاحب چوخ ثروتیدی
عاشق آل علی شیعۀ باهمتیدی
اون گونی ماه محرمده ئورک داغلاردی
ائوین ایلردی حسینیه عزا ساخلاردی
.
.
حاکم هند او محلاتیدن ایلوردی عبور
گوردی بیر عده قرا پوش اولونوب سینه ورور
قلب ناپاکینی دولدوردی ز بس کبر و غرور
شاهی تشویشه سالوبدور قورولان هنگامه
امر ائدوب کشف ائده لر بوردا ندور برنامه
.
.
شاهه عرض ایلدیلر که بو گون عاشورادی
قورولان بزم غم بند دل زهرادی
هر طرفده بئله بیر بزم عزا برپادی
شیعه لر محنتینی یاده سالوب آغلالار
ماتم شاه شهیداندا ئورک داغلالار
.
.
خشمگین ایلدی بو سوزلر او بی ایمانی
چاغیروب محضرینه بیر نئچه پست انسانی
دئدی ائو صاحبینی ایلیه لر زندانی
اود وروب یاندرالار ظلمیله کاشانه سینی
بلکه تعطیل ائده اول شیعه عزاخانه سینی
.
.
سیندروبلار غرض اول بزم عزا حرمتینی
اوائوین صاحبینین قیمت وشخصیتینی
جبریلن ایلدیلر غارت اونون ثزوتینی
ظاهرا او قورولان مجلسی خوار ایلدیلر
فاطمه قلبینی جنتده نزار ایلدیلر
.
.
اولدی او مرد غنی مثل تمام فقرا
گئچدی گونلر دولانوب ایل یتشوب ماه عزا
بیر گئجه یاتمادی اول شیعه ائدوب آه ونوا
دئدی یارب کرم ائت محنته یاندرما منی
مجلس یاسه گلنلردن اوتاندرما منی
.
.
نصف شب همسرینی ناله سی بیدار ائلدی
لاجرم همسرینه سرینی اظهار ائلدی
مرحبا اول خانما گور نئجه گفتار ائلدی
دئدی مشکلدی اگر عشقوی باشدان آتاسان
راضییم اوغلومی سن بَرده آدیلان ساتاسان
.
.
نوجوان اوغلی بیلوب مطلبی دوردی ایاقا
چوخ شجاعتله صلابتله گلوبدور قاباقا
منی اوخشاتمیون عرض ایلدی دیلسیز اوشاقا
قویمارام قلبیده قالسون او مقدّس هدفوز
راضییم اکبره خاطره منی قربان کسه سوز
.
.
سات منی قوی باباجان عالمه اعلان اولسون
مین بئله جانلار علی اکبره قربان اولسون
قوی بیزه اجر وئرن شاه شهیدان اولسون
ایستوسن گر بو مقدس هدفه تئز چاتاسان
دئمه اوغلومدی که شاید منی راحت ساتاسان
.
.
آنا وقتی که ئوز اوغلوندا صداقت گوردی
آناسیندا ولی بیر آیری شهامت گوردی
ایکی سینده بئله سودایه رضایت گوردی
ایلدی صبحه کیمین حمدوثنا داداره
صبح آچیلدی ایکیسی عزم ائلیوب بازاره
.
.
یولدا بیر شخص سواره ائلیوب جلب نظر
قامتی سرو کیمین صورتی مانندِ قمر
گوزلری قاشلاری مین یوسف کنعانه دگر
دئدیلر راکبه هاردان هایانا عزم ائدوسن
عجلون واردی یقین بیله شتابان گئدوسن
.
.
دئدی قصدیم بو سفردن بودی بیر برده آلام
رهنما اول منه بو امریده ای نیک مرام
آتاسسلندی که وار منده ده بیر یاخشی غلام
باوفا برده دی گوزدن بونی من آتمازدیم
احتیاجیم پولا اولمیدی اگر ساتمازدیم
.
.
مشتری گوردی اونون چهره سی چوخ برهمدی
سوروشوب قیمتین عرض ایلدی اون درهمدی
گرچه شایسته جوانه بئله قیمت کمدی
مشتری درد فروشندیه مرهم وئردی
سایدی اون درهمینه اون ایکی درهم وئردی
.
.
آلان آلدی ساتانون قلبی دوشوب تاب و تبه
آیریلان وقتیده اما گونوزی دوندی شبه
بالاسین تاپشوروب القصه او والا نسبه
بو جوانین دئدی سن قلبینی سیندرمیاسان
اشتباه ایلسه اللهه گوره ورمیاسان
.
.
گرچه مشکلدی آتا ئوز بالاسین گوزدن آتا
ولی آیریلدی مشقتلن ائوه گلدی آتا
نوجوان اوغلودا میندی او جنابیله آتا
طی راه ایلدیلر بیر نئچه ساعت ایکیسی
سالدیلار نیمه شب رحل اقامت ایکیسی
.
.
نوجوان گوردی او شخصین اونا چوخ حرمتی وار
ظاهرا اصل نسب صاحبیدی عزتی وار
عرض ائدوب لطفوون آیا منه نه علتی وار
ایندی بو یرده امیدیم بویوگوم سنسن آقا
سنی وئرم قسم اللهه بویور کیمسن آقا
.
.
دیله گلدی او زمان سرور احرار جهان
من حسینم دئدی قلبیمده وار اسرار نهان
قویمارام عاشقیمی دهریده اولسون نگران
کیم منی سلسه سه هر یرده اولا یاد ائدرم
کیم دخیل اولسا منه غصه دن آزاد ائدرم
.
.
بیلورم غارت ائدوبلر بابوین ثروتینی
داغیدوب اهل شقاوت قورولان هیئتینی
قویمارام من پوزولا شیعه لرین وحدتینی
بابامین شیعه سی لازمدی هماهنگ اولسون
قویماسونلار بو قرا پرچمی کمرنگ اولسون
.
.
عالمین تکیه سی اولادیمه اجدادیمه دی
نیلورم برده نی حورا منیچون خادمه دی
سند جنت الاعلاده منیم آدیمه دی
ایستدیم دوشمیه آیینه اسلامه لکه
من بو سوداده سیزون عشقوزی چکدیم محکه
.
.
ایندی یوم گوزلروی گئتمگه تاخیر ائلمه
آناوی غصه دن آزاد ائله دلگیر ائلمه
وطنوندن آرالی قالماقا تدبیر ائلمه
قویمیون خوار اولا برپا ائلیون هیئوزی
گتیرللر سیزه غارت اولونان ثروتوزی
.
.
قویما ناقص قالا بومطلبی ای طبع روان
گوزلرین یومدی امام امرینه شایسته‌ جوان
یتشوب منزله گوردی آناسین چوخ نگران
دیدی زهرا بالاسی قلبیمیزی شاد الدی
آند اولا حقه منی سروریم آزاد الدی
.
.
آنا گوردی بالاسین هولیله گلدی قاباقا
قولارین آچدی جوان اوغلینی آلدی قوجاقا
دیل دوتار توتماز اودم سسله دی ممنونم آقا
قویمادون شعله چکه آتش هجران یارالی
من اوزومده بو بالامدا سنه قربان یارالی
.
.
یاحسین اشبه پیغمبره جانیم قربان
اونیلا جنگیده همسنگره جانیم قربان
خیمه ده لبلی غم پروره جانیم قربان
قانیلن پهن اولونان بستره جانیم قربان
بند بندی قیریلان اکبره جانیم قربان
.
.
بالوون ذبح اولونان باشینه جانیم قربان
صود امر یاره لی قاداشینه جانیم قربان
زینبین تلیده گوژ یاشینه جانیم قربان
عترتون طی ایلین یولارا جانیم قربان
نحرین اوسته کسیلن قولارا جانیم قربان
.
.
خیمه لرده اوسوسوز قیزلارا جانیم قربان
جمله قارداشسیز اوغولسوزلارا جانیم قربان
برج عصمتده کی اولدوزلارا جانیم قربان
سینون اوستونده کی مه پاریه جانیم قربان
بوش قالان خیمه ده گهواریه جانیم قربان
.
.
سنی تک قویمیان انصاریوه جانیم قربان
زینبین همدمی بیماریوه جانیم قربان
شرمگین قولسوز علمداریوه جانیم قربان
سو کنارینده آخان اشکینه جانیم قربان
ظلمیلن پاره لنن مشکینه جانیم قربان
.
.
حقیله عهدووه پیمانووه جانیم قربان
قانلی مقتلده چیخان جانووه جانیم قربان
یاره لردن سوزولن قانووه جانیم قربان
سوسوزندان قورویان لبلره جانیم قربان
ظلم الیله کسیلن اللره جانیم قربان
.
.
سنده #احسان دی عزاداریوه قربانم آقا
باوفا قولسوز علمداریوه قربانم آقا
سینون اوستونده لبن خواریوه قربانم آقا
نجولار نوکرووی غم گونی بیر یاد ایده سن
قبرین اول گیجه سی باشیمین اوسته گله سن
.
.
#ورود_محرم
#حسینیه_مدح
#ای_قلم_زینت_ائله_دفتره_بسم_اللهی
#احسان_بدرخانی
#ترکی
.
✍️ #زبدةالاشعار ✍️

?: @nohe_torki