در مقام و منزلت حضرت سیّدالشّهدا علیه السّلام
..
..
مرحوم غلامعلی باقری الهامی (هوشی تبریزی)
..
..
دنیانی دوتوب نور درخشانی حسینون
آفاق اولوب واله و حیرانی حسینون
..
بیر شخصیدی جبریلی اونا اولماقا دایه
ممتاز اِئلیوب خالق سبحانی حسینون
..
بیر بنده دی خلّاقه، خلایق اونا بنده
مُجرادی هامی عالمه فرمانی حسینون
..
بیر حجّت باریدی اؤزی علّت خلقت
ایجاد اِئلیوب نوری بو دنیانی حسینون
..
زیبنده دی حورا گوزونه اولماقا سرمه
ممزوج اولوب اول توپراقا که قانی حسینون
..
حاتم که سخاوتده اولوب شهرۀ آفاق
هیهات اولا بیر ریزه خور خوانی حسینون
..
اول بارگه عرش جلالینده ملائک
فخر ایلر اولا صدقیله دربانی حسینون
..
بیر شوکته باخ آتش نمرودی خلیله
گلشن ایلیوب لطف فراوانی حسینون
..
بیر نهضت ایدوب عالم امکانیده دینی
زنده ایدوب اول نهضت شایانی حسینون
..
جان بذل اِئلیوبدور ره اسلامیده قانی
نشر ایلیوب عالم لره قرآنی حسینون
..
گون تک علن اِیلوب هامی آفاقیده حقّی
گر چه باتوب اؤز نیّر تابانی حسینون
..
باش اگمیه هند اوغلونا شخصیّتی اوسته
وادار اِئلیوب قوّۀ ایمانی حسینون
..
سرمشق ویروب آری هامی اهل جهانه
آزاده لیق عنوانینی عنوانی حسینون
..
هر مسلم دینداره ویروب درس شهامت
ای کاش اولا جانلار هامی قربانی حسینون
..
صبر ایتسون هامی درد و بلالرده دایانسون
امر ایتموشودی حضرت جانانی حسینون
..
گیچدی ره جانانیده اؤز ما ملکیندن
چون وقفیدی دینه سر و سامانی حسینون
..
بیر گول که اونون بیردی بهاریله خزانی
اکبردی یقین نو گل خندانی حسینون
..
قربان اِئلیوب صود امرین اللری اوسته
عشقینده داخی قالمیه نقصانی حسینون
..
جانانیله عهد ایتمیشیدی روز ازلدن
باش گیتدی ولی سینمادی پیمانی حسینون
..
مین شور و شهامتله ویروب گلشن دینه
قان سو یرینه جمله جوانانی حسینون
..
جمع ایلدی باشه نچه پروانۀ عشقی
تا صبح یانوب شمع فروزانی حسینون
..
(هوشی) ایلمز واهمه محشرده یقین ایت
هر کس اولا صدقیله نواخوانی حسینون
..
..
#حسینیه_مدح #دنیانی_دوتوب_نور_درخشانی_حسینون #هوشی_تبریزی #ترکی #زبدةالاشعار #حسینیه
نظر دهید