شهادت عاشورائیان
.
.
مرحوم بیضا اردبیلی
.
.
دوشدی نجه لیلا گوزی مژگانه پوزولدی
اکبر باشینا شانه ویروب شانه پوزولدی
.
.
افسون ایلیوب لیلینی افسانه مثالی
مژگانیله زلفون دارادی شانه مثالی
تولاندی اوغول باشینه پروانه مثالی
شمع شعله چکوب یاندی او پروانه پوزولدی
.
.
اکبر ائله عشق عالمینه غوطه ور اولدی
جان الده گلوب مقتله چوخ شور شر اولدی
شمشیر شررباریله شقّ القمر اولدی
پیمانی وروب صاحب پیمانه پوزولدی
.
.
قاسم نجه درک ایلدی پیمان الستی
فوراً یئتیشه محضر دلداره تلسدی
اولدی می عرفانون ائله عاشق و مستی
یوز قویدی گئدوب جانب میدانه پوزولدی
.
.
داماده بزندی حرم و سفره و لاله
ویردی او بساط اوسته فلک قانلی حواله
میثاقیده شمشیریله وصل اولدی وصاله
آفت یتیشوب صحن گلستانه پوزولدی
.
.
عبّاس یخلدی اودی بنیاد یخلدی
اللر کسیلوب قامت شمشاد یخلدی
قد انکسر ظهریده اسناد یخلدی
فکر ائت نجه اول قامت مردانه پوزولدی
.
.
آتدان یره اندیردی وزیری رخ ساده
بیر پیل صفت گلدی عمود الده عناده
شطرنجده شه مات ائلدی شاهی پیاده
کیش ایلدی سس دوشدی بیابانه پوزولدی
.
.
قولسوز باش آچوق محضر دلداره یئتیشدی
مین یاره ئیلن یاری گوروب یاره یتیشدی
گل آچدی وجودی ئوزی گلزاره یتیشدی
جان اوسته گوروب جانینی جانانه پوزولدی
.
.
قوچلار یاتیشوب یان یانا قالدی قوزی قربان
مغ، مغبچه الده او زمان اولدی نمایان
تاپدی یرینی بوس ائده اوچ شعبه لی پیکان
پیکان ئوزی ده پیکینه رندانه پوزولدی
.
.
مهدور دم اولدی نیه سلطان مدائن
الله قاننی توکدی یره امّت خائن
قان بحرینه مستغرق اولوب جمله سفائن
دین کشتی سی غرق اولدی او طوفانه پوزولدی
.
.
دنیا نجه تار اولدی هوا تیره بوروندی
محبوب خدا قوملارین اوستونده سوروندی
مصداق اذا زلزلت الارض گوروندی
توز قالخدی توز اوستن گنه میدانه پوزولدی
.
.
اود وردیلا قرآن داغیلوب آیه سی یاندی
الله ائوینون خیمه و همسایه سی یاندی
دوشدی خطره دین نبی پایه سی یاندی
یغمایه گئدوب خانه و کاشانه پوزولدی
.
.
هر یئرده اناالحق دئدی داش وئردی جوابین
حق آلدی انا الحق سسینون موج خطابین
درک ایلدی گه زینبینی گاه ربابین
آخدی گوزینون یاشی زنخدانه پوزولدی
.
.
سیر ایلدی «بیضا» اوتوز ایل سلک طریقی
تا ساحله توفیق تاپوب فلک غریقی
سرشار ایلیوب سینه سینی عشق حقیقی
درویشی گوروب کسوت شاهانه پوزولدی
.
.
کافر دگولم تابع قرآنم ازلدن
تکفیر ائلمه شرم ائله زاهد بو عملدن
سجّاده ده لبّاده ده جاندا گئدر الدن
اوندا گورونر مسجد و میخانه پوزولدی
.
.
#حسینیه #بیضا_اردبیلی #حسینیه_شهادت #ترکی #زبدةالاشعار
نظر دهید