در وداع حضرت امام حسین (ع)
.
✍️ #زبدةالاشعار ✍️
.
🆔: @nohe_torki
.
مرحوم غمناک تبریزی
.
زبس جهانی دوتوب و شوکت و جلال حسین
تمام قلب لره یول سالوب مقال حسین
.
وجود ملکنی پاک ایت چو وادی ایمن
تجلّی ایلیه تا جلوۀ جمال حسین
.
بو یرده اوزگیه یول یوخدی خلع نعل ایله
قدم قویا بو مقدّس چوله خیال حسین
.
دوشنده یادیوه بولّم که سنده جان قویماز
اگر تصوّره گلسه غم و ملال حسین
.
بصیرتون اولا باطن گوزیله بیر باخاسان
گورر گوزون که نه حاله دوشوبدی حال حسین
.
وداع ایلر عیالینی جمع ایدوب باشینا
آخار عیالینه باخدوقجا اشک آل حسین
.
بیوک کیچیک یغیشوب بیریره دایره وار
آلوب آرایه اونی آغلوری عیال حسین
.
ویرالّا سینه حرملر، اشکین توکر باجیلار
اولوبدی قیزلاری پروانۀ جمال حسین
.
بیری بابا بیری قارداش دیر بیری آقا وای
عجب فراقه مبدّل اولور وصال حسین
.
محبّتیله ویروب اهلبیته دلداری
ایدوبدی جوش اودم مِهر بی مثال حسین
.
یانخلی قلبلره لطفلن ویروب قوّت
ظهور ایتدی ولی باطن خصال حسین
.
اسیر اولماقا تا باغلیوبدی بلّرینی
دوشوب کمنده غزالان خسته بال حسین
.
یوزون دوتوب او زمان زینبه بویوردی باجی
شکسته قلبیوه گرچه دولوب کلال حسین
.
اطاعتیم سیزه واجبدی هر نه امر ایتسم
ایدون قبول بودور امر لایزال حسین
.
غمیمده صبر ایلیون ناله ایتمیون اوجادان
اودم که گون کیمی گورسوز یتوب زوال حسین
.
گورنده باشیمی گون تک جداده باش آچمیون
بونی قبول ایلمز شأن ذوالجلال حسین
.
حریم عزّته خوددارلیق بیر عصمت دور
محالدور اولا عزّتده ابتذال حسین
.
اگر سیزی سویالار جاهلان ناقص عقل
سیزه حجاب اولور سایۀ کمال حسین
.
فدا اولوم سنه ای شهریار عالی جاه
سنون غمونده اولوم من نه نوعی لال حسین
.
گرک ئولونجه یاس دوتوم اولوم «غمناک»
گلوم نوایه دیسونله بودور بلال حسین
.
.
#وداع_غمناک_تبریزی
#حسینیه_وداع
#ز_بس_جهانی_دوتوب_و_شوکت_و_جلال_حسین
#ترکی
.
✍️ #زبدةالاشعار ✍️
.
🆔: @nohe_torki
نظر دهید