زبانحال امام در بالین برادر
.
.
کامران اسدی حقایق
.
.
ای قاندا غرق اولان دل خونباره بنزی سن
چوخ سولموسان خزان زده گلزاره بنزی سن
.
.
ای جان نثار عشق اولان کربلاده سن
سنگ تمام قؤی موسان الحقّ وفاده سن
سالدین ٱحد گونونده کی ایثاری یاده سن
ای حیدر اوغلی حیدر کرارّه بنزی سن
.
.
سن جام عشقی آلماقا دنیانی آتمی سان
هرساغ لیقی سلامتی بو عشقه ساتمی سان
هر آل وئریوی ای لییب آخرده یاتمی سان
محتاج استراحت سرشاره بنزی سن
.
.
کامل بو گوزلرین یومولان میر باخیر یارا
من بو یاریم چیلیق یومولان گؤزلره فدا
هر قدر ایستی سن منه باخ ای بوتون وفا
باشدان ایاقه تشنهء دیداره بنزی سن
.
.
قارداشه چوخ مدد وئرن اولموش بو نوع یوخ
بو قارداشی لن آیری سینین فرقی چوخدی چوخ
قوی بنزدیم سنی اوزووه ای باشا باش اوخ
عباس نامدار و وفاداره بنزی سن
.
.
اوخلار سالیب حصاره بو هیبتلی قامتی
لمس ایلمک چتیندی یل پر جراحتی
قارداش بو اوخلارین قفسه وار شباهتی
سنده قفس ده شیر گرفتاره بنزی سن
.
.
دلداده ایستیری گئده دلداردن قاباق
ترک ایلیسن بو عالمی سن یاردن قاباق
سن ارتحال جامینی بیماردن قاباق
نوش ایلیین وفالی پرستاره بنزی سن
.
.
دوشدین یره گینه ده سرافراز عشق سن
بال و پرین سینیب گینه شهباز عشق سن
بی بال و پرده لایق پرواز عشق سن
واضح دییم کی جعفر طیاره بنزی سن
.
.
هر چند دوشمی سن یره هیبت یرینده دی
دوغرانمی سان ولی گینه صولت یرینده دی
گوهر سینیب ولی, گینه قیمت یرینده دی
قول سوزدا قوللّی قووه لی سرداره بنزی سن
.
.
ال تاپماقا بو پیکره ای یار خوش مرام
هر سمتدن گتیردی سنه اوز سپاه شام
دورنده ائتدی جان آلان اشخاص ازدحام
پر مشتری جواهر شهواره بنزی سن
.
.
انبوه دشمنه سن ائدیرسن نگاه گاه
گاهدا باخیب حسینه اورکدن چکیرسن آه
قارداش چوخ ایلیسن بو ایکی سمته سن نگاه
دل واپس نگار علمداره بنز ی سن
.
.
سوز وئردین اؤللّم اولمارام اما اسیر ننگ
قوی شیشهء حیاتیمه دیسین دئدین کی سنگ
امضا ائدیبدی سوزلریوی گور نئچه خدنگ
ارزشلی اعتبارلی طوماره بنزی سن
.
.
جاندان دوشوبدی دشمنی جاندان سالان بدن
قان یاغدیریر بو یوزلر اوخی لن چالان بدن
قارداش بو اوخلارین آراسیندا قالان بدن
قؤیمور دییم کی سن گل بی خاره بنزی سن
.
.
چوخ حسرتیله قارداشیوا گوز تیکیب گؤزون
گلمیر دیلین بیان ائدیری گؤز اونون سؤزون
اؤلما گوزه امید امیدیم دانیش اوزون
گفتاره گل کی تشنهء گفتاره بنزی سن
.
.
سوغاتی می دئمه یاری یولدا ایتیرمی سن
من فرعی نیلیرم منه اصلی یتیرمی سن
سیل ذهن دن او قطره نی دریا گتیرمی سن
قوی گؤرمییم کی بیر الی بوش یاره بنزی سن
.
.
عباس «کامران» سنی توصیف ائدن میری
بیر پیچ و خملی یولدادی آسان گئدن میری
پیچیده نی راحات بیرینه بنزدن میری
سن بیر ظریف معنی دشواره بنزی سن
.
.
#عباسیه #کامران_اسدی
#عباسیه_شهادت
#ای_قاندا_غرق_اولان_دل_خونباره_بنزی_سن
#ترکی
#زبدةالاشعار
نظر دهید