طفلان زینب (ع)
.
✍️زبدةالاشعار✍️
.
🆔: @nohe_torki
.
.
مرحوم حسینی سعدی زمان
.
زینبون قارداش قبول ائت بو قوزی قربانلارین
اوغلون اکبر تک سنه ائتسونله قربان جانلارین
.
ای گوزل آدی یر و گوی اهلینه باب نجات
گل دولاندور باشیوه بیکس باجون باشین اوجات
چوخ دئمه هل من معین ای دادخواه کائنات
کلمۀ لبَّیکینه باخ بو ایکی نالانلارین
.
.
باغباندور گلشن عشقونده بو خونین جگر
رسمدور شاهه قیزیل گل باغبان تقدیم ائدر
تشنه لیق قویموب طراوتدن بو گوللرده اثر
زینبون فرض ائت قزل گول بو گُلِ خندانلارین
.
.
سن قبول ائتدون او گونکه بو بلا و محنتی
باجوون اولدی سنیله هر بلایه شرکتی
وار او پیماندا بولاریندا بیر عالی خدمتی
قوی گئچوب باشدان یتورسونلر باشا پیمانلارین
.
.
باش وئروب قاسم اوجالدوبدور سریّه باشینی
لیلینون اکبر فراقی قان ائدوب گوز یاشینی
خیمه ده اوخشور سکینه نوجوان قارداشینی
یوز وئرر خجلت گورنده اونلارین افغانلارین
.
.
شهر یثربدن چخان ساعتده عبدالله اؤزی
زینبه مخفی وصیت ایلیوبدور بو سوزی
موقع جنگ و جدلده حفظ ائدن اَل دور گوزی
گوز حسینیم دور بولار اَل ، ازبر ائت عنوانلارین
.
.
عالم عشقونده اسگیک بُلمه لیلادن منی
سالما آیری وای اوغول وای دا او ثکلادن منی
ایلمه شرمنده روز حشر زهرادن منی
اکبرین قانیله قوی قاتسون بولاردا قانلارین
.
.
گوز یاشی بیر نحویله سرشار ائدوبدور گوزلرین
غصه دن شرح ائتماقا قادر دگوللر سوزلرین
وئرمه سن اذن ئولدورللر بو اوشاقلار ئوزلرین
گوزلرون قربانی قارداش وئر ئولوم فرمانلارین
.
.
شرعیده عورتلره گر جایز اولسیدی جدال
اذن آلوب سندن جهاد ایلردیم ای فخر رجال
لا محاله وئر بو ایکی طفله فرمان قتال
ناامید ائتمه آز آغلات دیدۀ گریانلارین
.
.
ائتدیلر بسکه امامه اوچ طرفدن التجاء
عاقبت خواهی نخواهی شاه دین اولدی رضا
آلدیلار بیر جفت شیرِ بچّه تا اذن دغا
اشگیله سوندوردولر نارِ دلِ سوزانلارین
.
.
آلِ هاشم شیردور ایستر صغیر اولسون کبیر
شیر تک میدانه یوز قویدی ایکی طفل صغیر
حیرته صولتلریندن دوشدی اول قوم شریر
لشگره گوستردیلر اوز قوت ایمانلارین
.
.
باخدی سعد اوغلی اولارین قامت رعناسینه
زینبون ائتدی تعجب عشقینه سوداسینه
گلدی اوتوز بیر ستمگر بونلارین دعواسینه (1)
وئردیلر باد فنایه اوز سر و سامانلارین
.
.
سالدیلار آخر ایاقدان لشگر کوفه بیرین
قارداشین قارداش گورنده قان ایچینده دلغمین
آنّینا قویدی الین بیر اوخدا آتدی بیر لعین
ال تیکیلدی آنّینا گور کوفیان خسرانلارین
.
.
هر ایکی قارداش یخلدی توپراق اوسته ناتوان
ئولمه میشدی جان بیرینده واریدی چکدی فغان
سسلدی فریاده گل یا خال ادرکنا امان
گل چخارت دشمن ایچیندن اؤز باجون اوغلانلارین
.
.
خیمه ده تا سمع شاه تشنه کامه یتدی سس
گلدی میدانه وئرن عیسایه مهد ایچره نفس
رزمگهدن خیمیه گتدی ایکی قوش سیز قفس
سسلدی اؤز گللرینون بلبل خوشخوانلارین
.
.
بو اسفلی صوتیله دولدی خیام طاهرات
ماجرادن باخبر اولدی خواتین و بنات
بیر بیرین ائتدی مخاطب عترت عین الحیات
شه ، گَلون گتدی بلالی زینبون قربانلارین
.
.
خارج اولدی خیمه دن یکسر خواتین حرم
چخمادی اما کناره زینب مریم شیَم (2)
بو خیالیله چکر خجلت امام محتشم
خیمه ده قالدی اوغوشدوردی ایکی پستانلارین
.
.
اکبرین گلجک همان گون خیمیه اما سسی
گوردولر عرشه چخوبدور زینبون غوغا سسی
سمت میداندان گلور صدیقه صغری سسی
ناله سی تکمیل ائدیر کرب وبلا نقصانلارین
.
.
نعشی اوسته اکبرین باشی آچوق سالدی اؤزون (3)
قطره قطره قلبینی قان ائتدی دولدوردی گوزون
وا اخی وابن اُخَیَّ ایلدی از بس سوزون
گوزلرین آغلاتدی یکسر فرقۀ عدوانلارین
.
.
خیمه گاهه نعشینی حمل ائلدی یالقوز امام
بانوان هاشمیه آلدیلار دورین تمام
ایلدی رختین سویوندورماقه بعی اهتمام
جسمدن بعضیسی چکدی ناوک پیکارنلارین
.
.
ای عزیز فاطمه شاه ملائک پاسبان
آستانوزده سیزون درباندی «سعدیِّ زمان»
نا امید ائتمه قاپوندان وئر صله قیل شادمان
ناامید ائتمزله سلطانلار شها دربانلارین
.
(1)مجلد دهم بحار ص 237 :محمد ابن عبدالله 10 نفر کشته و عون ابن عبدالله 3 نفر سواره و 17 نفر پیاده کشته است.
(2)مصائب الابرار ص 128
(3)مقتل ابی مخنف ص 70 – لهوف ص 41
.
.
#طفلان_زینب #سعدی_زمان
#زینبون_قارداش_قبول_ائت_بو_قوزی_قربانلارین
#چهارده_معصوم_حسینی ص 93
#ترکی
.
✍️ #زبدةالاشعار ✍️
.
🆔: @nohe_torki
نظر دهید