زبانحال حضرت رباب (س)
..
..
رضا غلامپور (دلپاک)
..
..
سالیبدیر جانیوه سوز عطش چوخ التهاب اصغر
ئولیدی کاش گورمیدی سنی بیله رباب اصغر
..
بو نوعی طائر روحون که آچمیش بال و پر إئتمیش
اوزونه بیگمان باغ بهشتی انتخاب اصغر
..
عیار محنتیم معلوم اولور دوشدوقجا پیوسته
گوزومدن گوهر رخسارون اوسته اشک ناب اصغر
..
بو نوعیلن که گویدن اود یاغیر بو قلب زاریم تک
یانیر بالله شرار غمده قلب آفتاب اصغر
..
گل رخساریوه یکسر خزان وورموش گلستاندا
آنان اشکین الیر مین حسرتیله چون گلاب اصغر
..
نفسدن دوشمه ای انفاسینه بو خسته جان مدیون
که دوشسن منده قالماز تا نفس وار صبر و تاب اصغر
..
باتارسان سن گونش تک محنتون دلدن باتا هیهات
که بو غمده باتار گرداب درده نه قباب اصغر
..
منیم ای کوکب بختیم گوزون آخدیقجا الدوز تک
بو شان شان قلبیمه گویا دگور تیر شهاب اصغر
..
دل آچ مشکلدیم بیر یول منه سن بیر دعا ایله
که ائتسن سن دعا حق فوراً ایلر مستجاب اصغر
..
اگر چه سیل اشکیله گوزوم بنیادی ویراندور
ولی جولان وئریر صحرای قلبیمده سراب اصغر
..
گوزون یوما گوزون قربانی گوزدن گل منی آتما
بو گوزلر حیفدور باغلانماقا اولسون مجاب اصغر
..
ائله دوتقوندی حالیم بو سارالمیش طلعتوندن کی
کأنّه گون قباقین سدّ ائدیب تیره سحاب اصغر
..
یاریم ایل عمر ائدیب چکدین نه لر گوردون نه محنتلر
غمون گلمز حسابه هرقدر ائتسم حساب اصغر
..
ترحّم ائت منه بو تزلیقا گل مندن آیریلما
دایان آیریلماقا مندن بئله ائتمه شتاب اصغر
..
منی بیر نسگیلین دلدن سالار ئولّم بو نسگیلدن
سوسوزسان سن چوله اما آخیر بو چولده آب اصغر
..
تأمّل ایلیرم چوخ بولمورم اما اولاردی نه
سنه بیر جرعه وئرسیدی سو قوم کین مآب اصغر
..
آنان ئولسون دلون آغزیندا اود دوتدی کباب اولدی
که هئچ دل اولمیوب اولماز بئله بیرده کباب اصغر
..
سوزوم یوخ تشنه سن اما بو اندازه اوزون یورما
بیر آز الله خاطر ائت بو سینم اوسته خواب اصغر
.
اولیدی راه چارم باغلامازدیم قولارین هرگز
که عمروم خانه سین سیل بو غم ایلر خراب اصغر
..
گهی لای لای دئیوب گاهی غمونده گلم افغانه
گهی گیزلین سوورام باشیما یئردن تراب اصغر
..
دلون اولسیدی یانمازدیم بوقدری آتش غمده
آلاردیم من خبر دردون وئرردین سن جواب اصغر
..
سو فکرین آت باشیندان کی کیمین فکریندا سو اولسا
گرکدور زلفنی ائتسین بوگون قاندان خضاب اصغر
..
کیمی گوردوم کیمه دردون دئدیم سو ائستدیم کیمدن
الیله خجلتیدن عارضه چکدی نقاب اصغر
..
منیم تک سنده یورقونسان سنون تک منده عطشانم
که حاکمدور دلون تک بو دلیمده اضطراب اصغر
..
سنون «دلپاک» دردیندن یازیر اما بولور توتماز
کتابت وقتی بیر درد و ملالون مین کتاب اصغر
..
ووروب چنگ توسل دامنوندن کام دل آلسین
نظر قیل تا مرامی اوسته اولسون کامیاب اصغر
..
یازیب بیر دودماندا بو سوزی که غرق مشکلدور
نظر سالسین سن ائیسته اول مکانه بوتراب اصغر
..
..
#اصغریه #دلپاک #اصغریه_شهادت #ترکی #زبدةالاشعار
نظر دهید