در ضربت خوردن حضرت امیرالمومنین علیه السلام
#گریز به کوفه
.
.
#سبک_زینبم_جان_اوستیم
#سبک_کربلا_اؤز_ائتدیقیم_امضایه
.
.
مرحوم صابر تبریزی
.
.
سجده ده ضربتلنوب شاه ولایت کوفه ده
آل طاهایه اولوب برپا قیامت کوفه ده
.
.
حضرت کلثومه اولشه بو گیجه مهمانیدی
صبحه تک مشغول طاعت آیت ایمانیدی
واقف اوز قتلندن اول شاهنشه مردانیدی
هردم اوز قتلندن ایلردی اشارت کوفه ده
.
.
راوی مطلبدی آرام دل فحل الفحول
ام کلثوم بلا کش در دریای بتول
نقل ایدر گوردوم بابامی بو گیجه خیلی ملول
مضطربدور حالی ایتمور استراحت کوفه ده
.
.
عالم علم لدنی هادی دین الاه
نچه دفعه چخدی صحنه حالی پوزقون دلده آه
ثابت و سیاره ایتدی گوزده گوز یاشی نگاه
ذکر لا حول ایلدی اولشه قرائت کوفه ده
.
.
عادت مآلوفیله محبوب حی دادگر
اول شبدن عبادت ایلدی صبحه قدر
عازم اولدی مسجده صاقدا قضا صولدا قدر
آچدی اوز اولادینه ابواب محنت کوفه ده
.
.
گلدی محراب عبادتده دایاندی شاه دین
اولدی مشغول نماز اول حجت روی زمین
ابن ملجم تیغ زهر آلودیله ایتدی کمین
حجه اللهین باشندان وردی ضربت کوفه ده
.
.
باش بولوندی وجه وجه اللهی رنگین ایتدی قان
سر وانشق القمر محرابده اولدی عیان
سسلدی فزت برب الکعبه شاه انس و جان
یعنی قورتولدوم مصیبتدن بو ساعت کوفه ده
.
.
تاجینی باشدان آتوب روح الامین ایتدی نوا
سندی ارکان هدا الدی علی المرتضی
تا ایشتدی بو سوزی اوغلی حسین و مجتبی
قویدولار یوز مسجده افسرده حالت کوفه ده
.
.
مجتبی یردن گوتوردی پارچالانمیش باشینی
دیزلری اوسته قویوب توکدی یوزه گوز یاشینی
آغلادی آغلادی شوریله حسین قارداشینی
سولدی باد ظلمیله باغ رسالت کوفه ده
.
.
کوفه نی ویران اولا چوخ گوزلری آغلار قویوب
لاله تک چوخ قلبلرده غصه دن داغلار قویوب
زینب کبری قاپوسین ظلمیله باغلار قویوب
عصمت صغری چکوب درد اسارت کوفه ده
.
.
کوفیان دوندردیلرقانه اونون گوزیاشینی
کربلاده تشنه لب الدوردولر قارداشینی
داد او گوندن نیزده گوردی حسینون باشینی
محمله وردی باشین اول کان عصمت کوفه ده
.
.
بیر خانم که گورممشدی گل جمالین آفتاب
کوچه و بازارده زلفی جمالنده نقاب
کوفه شهرینده دولاندی هر ایکی قولدا طناب
کف چالوب کفار اونا ایتدی شماتت کوفه ده
.
.
بیر گلیم القصه احباب ولایت گتدیلر
شهریار زخمداری منزله حمل ایتدیلر
تا کنار بیت شیر کردگاره یتدیلر
آچدی قانلو گوزلرین دریای رآفت کوفه ده
.
.
ایتدی اصحابین مخاطب اول یارالی شهریار
اوز ایویمه اوز ایاقیمله گرگ ایلوم گذار
زینبیم قورخار منی گورسه باشیمدان زخمدار
باشیمه بلمور گلوبدور نه مصیبت کوفه ده
.
.
یا امیرالمومنین ای معدن رحم و عطا
اولمادون راضی گوره زینب باشوندا بیر یارا
بس نجه گوردی همین بو زینب بی اقرابا
بیر حسین باشنده اون یدی جراحت کوفه ده
.
.
باشلیوبدور نیزه ده حق اوسته تحقیقاتینی
تا ایده تکمیل دین اوستنده تبلیغاتینی
آل سفیانی پوزا بالمره تشکیلاتینی
ناطق قرآن ایدور قرآن تلاوت کوفه ده
.
.
باشلادی زهرا قیزی بیر خطبه خیلی آتشین
حیدر کرار تک دلده کلام آتشین
زینبون هرکیم ایشتدی صوتینی ایتدی یقین
باشلیوبدور مرتضی منبرده صحبت کوفه ده
.
.
ای سخاوت کانی ای شیر خدا شاه حجاز
صادر ایله «صابره» بو جمعیله لطفا جواز
سن قیلان محرابده بو ایل قیلاخ بیزده نماز
مسلمین قبرین ایداخ جمعا زیارت کوفه ده
.
.
.
.
#حیدریه_شهادت
#کوفه
#سجده_ده_ضربتلنوب_شاه_ولایت_کوفه_ده
#ترکی
#زبدةالاشعار
نظر دهید