من فاطمیم مصحف غیرتده مشعشع #فاطمیه_الماسی_اهری

#من_فاطمیم
.
.
الماسی اهری
.
.
من فاطمیم مصحف غیرتده مشعشع
نسوان بهشت ایچره منم افضل و ارفع
فخر ایلیورم اولمامیشام غرق مرصّع
قرآن اوخیوب مال حرامی یئمدیم من
وجدانیم اولوب خلقه تملّق دئمدیم من
.
.
من فاطمیم منطق اسلام شعوریم
بیت الحزنیم اولدی منیم وادیِ طوریم
بیر ذره قدر اولمادی طاعتده کسوریم
غاصبلری منطقله زمین گیر ائلدیم من
گوساله پرست دشمنی تحقیر ائلدیم من
.
.
من فاطمیم احمد مختار آتامدور
گنجینه ی پر گوهر اسلام آنامدور
شاه شهدا سیّد ابرار بالامدور
اسلامه عمل ائتمگه همّت ائلدیم من
حق کیمدی حقیقتدن حراست ائلدیم من
.
.
من فاطمیم حقدی سوزوم یوخدی گناهیم
الله اوزی هر یئرده اولوب پشت و پناهیم
یئردن هله چوخ گویده منیم واردی سپاهیم
بیر خطبه دئدیم حجتی اتمام ائلدیم من
غارتگر اولان حاکمی اعدام ائلدیم من
.
.
من فاطمیم شیشه ی عمروم داشا دگدی
بار محنیم سرو رسا قدّیمی اگدی
بی مدرک و بیجا یئره دشمن منی دوگدی
اون سگیز ایل عمروم گوزی یاشلی سپر اولدی
سیلی منه قنفذ یاراسیندان بتر اولدی
.
.
من فاطمیم درگهیمه شعله قالاندی
دیواره دایاندیم اتگیم شعلده یاندی
سقط اولدی بالام سینمه مسمار توخاندی
ثانی قاپیما ویردی لگد کینه ده دوردی
اَل دوتدوم علیدن ولی قنفذ منی ویردی
.
.
من فاطمیم زندگیده چوخ غمه یاندیم
اوز حقیمین اوستونده دوگولدوم یارالاندیم
ثانی کی منی ویردی،حسندن چوخ اوتاندیم
چوخ محنتیمی زینبه فاش ایلمدیم من
سیلی جریانیندن علیّه دئمدیم من
.
.
من فاطمیم باد خزان گلشنه دگدی
حق اوسته دایاندیم سخنیم دشمنه دگدی
ثانینین آغیر سیلی سی محکم منه دگدی
زینب منی گورمگله دوداغی بوزوشردی
سیلی یئری هی یادیمه دوشچک قیزیشاردی
.
.
من فاطمیم اون بیر آیین اختری اولدوم
مظلوم علینون یارالی یاوری اولدوم
اوز باغیمه ارثیّه میدی مشتری اولدوم
محنت قاپیما خیمه قوروب قدّیمی اگدی
کسدی یولومی کوچه ده ثانی منی دوگدی
.
.
من فاطمیم اگدیکیمی دَرمَدیم ئولدوم
آغلار دولانیب زینبی گولدورمدیم ئولدوم
قنفذ یاراسی بیر کسه بیلدیرمدیم ئولدوم
هچ کس منه تای دار فناده ئولن اولماز
من گتدیم حسینه داخی لایلای دین اولماز
.
.
من فاطمیم رخت غمی سویمادیم ئولدوم
(راحتلیگیلن بالشه باش قویمادیم ئولدوم)
افسوس،حسیندن دولی گوز دویمادیم ئولدوم
گر قسمت حسین اولسا ملالینده بوروننم
سینمده یارا مقتلیوه ساری سوروننم
.
.
#فاطمیه #الماسی_اهری #فاطمیه_مدح #فاطمیه_شهادت #ترکی #زبدةالاشعار