گوز آچ شامه سفر ایلور بلالی زینبون قارداش

کوچ از کربلا
.
✍️ زبدة الاشعار ✍️
?: @nohe_torki
.
محمّد علی بلوری
.
گوز آچ شامه سفر ایلور
بلالی زینبون قارداش
ستمله آیریلور سندن
وفالی زینبون قارداش

.
سولوب ظلمیله گلزارون طراوت سَلب اولوب گلدن
اسوب باد خزان گویا نشانه یوخدی سنبلدن
آلوب درسبن باجون زینب چمنده غملی بلبلدن
دیور هجران سوزون آغلور نوالی زینبون قارداش

.
اویان ای همدم زینب یاخوندور موسم فرقت
چتین دور حشره تک دوشسون اَله بیرده بیله فرصت
دینه دردون دیوم منده اورکده قالماسین حسرت
داخی درد دله اولماز مجالی زینبون قارداش

.
آچوب پر طایر روحیم بو چولده اشتیاقوندن
قونوب هجرانه توشه اخذ ایده وصلین بوداقیندن
قالوبدور بلبلون گل سوز یانور نار فراقوندان
باخاندا گلشنه آرتور ملالی زینبون قارداش

.
تاپوب سنسیز خلل بالله سماده ثابت و سیّار
دوشوب توپراقلار اوسته گوئیا عرش حق دادار
کواکب تک گزور حیران بو چولده عترت اطهار
تاپوب آخر سنان اوسته هلالی زینبون قارداش

.
یارالی باشوی ویرموش عدو جبراً سنان اوسته
بدن یرده آخور قانی دگوب اوخ دسته به دسته
یانور دلدن او احواله باخان دمده بو دلخسته
اولور اوز زلفی تک پوزقون خیالی زینبون قارداش

.
دوشوبدور عترتین امری بو چولده مشکله سنسیز
اویان گور بیر نجه دشمن سالوب فرصت اله سنسیز
ویروب اود خیمه لر یاندی داغیلدوق بیز چوله سنسیز
اولوب یغما جفائیله جلالی زینبون قارداش

.
بو مطلبدور سنون قارداش نشانگر عزّ و جاهوندن
جنان عطری بو گلشنده گلور هر گل گیاهوندن
زیارت ایلیوب حتماً آنان بو قتلگاهوندن
گوریدی کاش زهرانی بلالی زینبون قارداش

.
ائدیدی عرض بو چولده قیزون دوشدی غم و درده
نجه تاب ایلسون گورسون بو احوالی برادر ده
قالوبدور قارداشیم باشی آنا ظلمیله اللّرده
پوزاردی حالینی پوزقون بو حالی زینبون قارداش

.
بو اوخلی پیکرون گوردوم عذاره باغلادیم قانیاش
چکیدیم پیکروندن اوخلاری امکان اولیدی کاش
ولی افسوس اولا یوخ فرصتیم شمر ایلوری پرخاش
دونوب قانه اودور اشک زلالی زینبون قارداش

.
سزادی نعشون اوسته حشره تک گر ایلسم شیون
اولوب گنجینۀ حکمت خدنگ کین ایچون مدفن
سلیمان خاتمون غارت ائدوبدور هانسی اهریمن
اولوب باعث ایده ناله وفالی زینبون قارداش

.
گوروم اولسون ایکی دنیا سیه رو آل سفیانی
آتاما ائتدیلر بیر ظلم ترک ائتدی بو دنیانی
حسن قارداشیمون طشته توکولدی لعل تک قانی
حسینون پیکرین گوردی یارالی زینبون قارداش

.
اذیّت آل طاهایه ستمگرلرده عادتدور
آنام زخمی گیدوب قبره او عادتدن اشارتدور
قولومدا قمچی نون ردّی جفالردن علامتدور
دوگولدی ظلمیله زهرا مثالی زینبون قارداش

.
سنه ای زادۀ حیدر مجالیم یوخ دوتام ماتم
عزادارون سرشکیله قویار بو دردیمه مرهم
بو عنوانی یازار آغلار «بلوری» ذکر ایدر هر دم
ستمله آیریلور سندن وفالی زینبون قارداش

.
#سبک_علی_اصغر_مه_انور (بیش از 7 سبک)
.

#کوچ_کربلا
#گوز_آچ_شامه_سفر_ایلور_بلالی_زینبون_قارداش
#بلوری
#ترکی
.
✍️ #زبدةالاشعار ✍️

?: @nohe_torki