یا مهدی
.
✍️ #زبدةالاشعار ✍️
.
🆔: @nohe_torki
.
مرحوم کهنمویی
.
ایا عصرین امامی شریعت گولی سولدی
ظهور ایله اماندور جهان ظلمیله دولدی
.
.
اوگوندن که بویوردی سنه خالق یکتا
اؤزون ایلمه ظاهر ایله غیبت کبری
ایشیق گوندوز اولوبدور بیزه لیلۀ یلدا
ظهور ایله اماندور جهان ظلمیله دولدی
.
.
گیدیر گون به گون الدن مزایای شریعت
قالوب صورت ظاهر مجاز اولدی حقیقت
مسلمان دییلن لر قویور دینیده بدعت
ظهور ایله اماندور جهان ظلمیله دولدی
.
.
بیر عده آدی مسلم اوزی کافر مطلق
ویرور ظاهر دینه ریا قصدیله رونق
ایدیر خلق آراسندا بو حق مذهبی ناحق
ظهور ایله اماندور جهان ظلمیله دولدی
.
.
بیر عده گورور اولمور دینون احکامی اجرا
مسلمانه دمادم یتور کفردن ایذاء
قبول ایتموری دینی قاچور دیندن اصلا
ظهور ایله اماندور جهان ظلمیله دولدی
.
.
بیر عده گجه گوندوز بودور فکر و خیالی
ساتوب دیننی آلسون گورن جاه و جلالی
بیری ئولسه آجندان اونون یوخدی ملالی
ظهور ایله اماندور جهان ظلمیله دولدی
.
.
بیر عده فقرادن دانور حکم خدانی
آتور مذهب و دینی دوتور میل و هوانی
بودور فکر و خیالی پوزا نظم جهانی
ظهور ایله اماندور جهان ظلمیله دولدی
.
.
مسلمانلار ایچینده بوگون فاصله چوخدور
بیری هر زادا مالک بیری هیچ زادی یوخدور
دل مرد خداده بو بیر زهرلی اوخدور
ظهور ایله اماندور جهان ظلمیله دولدی
.
.
حقوق فقراده گلوبدور نچه آیات
اوخونسا عمل اولسا اولور عدل و مساوات
هانی خوف خدادن ایدن حقی مراعات
ظهور ایله اماندور جهان ظلمیله دولدی
.
.
حدودینده دایانمور نه دولت نه رعیت
کیمون هر کیمه چاتسا گوجی ایلور اذیت
آدی عصر تمدن، زمان بَدَویّت
ظهور ایله اماندور جهان ظلمیله دولدی
.
.
بیر عده فقرانون آلور حقین الیندن
ولی دوشموری بیر آن خدا ذکری دیلیندن
هاچان بس گوره جاقدور جزا اوز عملیندن
ظهور ایله اماندور جهان ظلمیله دولدی
.
.
ظهور ایله اماندور ایا مجری قرآن
اولوب حالی پریشان بو بیر عده مسلمان
ویرن یوخ سسینه سس قالوب واله و حیران
ظهور ایله اماندور جهان ظلمیله دولدی
.
.
بو دین ایله دی تشریع بیزه امر جهادی
دفاع واجب عینی اولان امر خدادی
بو احکام اولا تعطیل خدایه نه روادی
ظهور ایله اماندور جهان ظلمیله دولدی
.
.
بو دین اوسته آخوبدور یره سوکیمی قانلار
اولوب خاكیله یکسان برازنده جوانلار
فدا دینه اولوبلار بو دینه اینانانلار
ظهور ایله اماندور جهان ظلمیله دولدی
.
.
بو دین اوسته حسینون بلا دوره سین آلدی
یارالی بدنیله اونی توپراقا سالدى
باشی گیچدی جدایه بدن سجدده قالدی
ظهور ایله اماندور جهان ظلمیله دولدی
.
.
جدا اوسته دایاندی ایدوب مقصدین اعلان
که من عاشق حقّم سوسوز دینیمه قربان
اودور نیزه ده باشیم اولور گون کیمی تابان
ظهور ایله اماندور جهان ظلمیله دولدی
.
.
منی قتله یتوردوز که حق بی اثر اولسون
ولی نخلۀ باطل گرک بی ثمر اولسون
من ئولّم که حقیقت داخی جلوه گر اولسون
ظهور ایله اماندور جهان ظلمیله دولدی
.
.
مین اوچ یوز اوتوز ایلدی تاپوب فیض شهادت
آچوب مکتب قرآن ویروب درس سعادت
حسینیلَره اولدی اونا آغلاماخ عادت
ظهور ایله اماندور جهان ظلمیله دولدی
.
.
حسین گیتدیقی یولدان بیری گیتموری اصلا
نه ایش ایستوری ایلور دیور باری خدایا
بوگوز یاشلاریله یو، ایداخ هر نه خطایا
ظهور ایله اماندور جهان ظلمیله دولدی
.
.
دییَنده بو نه ایشدور دیور آغزیمی آشما
بهائی سوزیدور بو، داخی دینمه دانشما
عزادار حسینوخ عزاداره دولاشما
ظهور ایله اماندور جهان ظلمیله دولدی
.
.
ایا عصرین امامی ایا مجری قرآن
اولور کافره تابع دانور دینی مسلمان
«ریاضی» باخور آغلور دیور هاردا قالوبسان
ظهور ایله اماندور جهان ظلمیله دولدی
.
#مهدیه
#پندیات
#ایا_عصرین_امامی_شریعت_گولی_سولدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید