در مقام معلم
.
.
حاج علی اشرفی عین الدین
.
.
ای منه ئورگه دن الف بانی
اوخویوب یازماقا اولان بانی
.
انبیایه زمانه ده مظهر
حل ائدن هر چتین معمانی
.
ای بئجردن ئورک قانیلان گل
ابدیّت تاپان گلستانی
.
اولان ایستکلی والدین مثلی
ای محبّتلی ای وفا کانی
.
ئوره گیم سنله باغلیوب پیمان
تا وارام قیرمارام او پیمانی
.
ساغ الیمدن دوتوب دئدون اوغلوم
خط لن دوز یاز اولسا امکانی
.
ید بیضا واروندی موسی تک
دوندریبدور نسیمه طوفانی
.
مشقمه یازدون (آفرین خوب است)
منه وئردی او جمله دنیانی
.
ساده بیر شعریمه دئدون (احسنت)
طبعیمین ده آچیلدی میدانی
.
جامه ی جانون علملن توخونوب
یاراشور بو معلم عنوانی
.
آتاسان سن او خاطره آتالار
سنه تاپشوردی دسته ریحانی
.
آناسان گر خانم معلم سن
بیردی شأنوز نه اوّل و ثانی
.
طلب العلمی بیر فریضه بیلن
فرقلی بیلمیوب مسلمانی
.
بویوروب ئورگه شین ولو چین دن
سئچمیوب الذکر والانثی نی
.
ایکی دور رهنمای انسانلار
بیری سیزلر بیری ده روحانی
.
مدرسه حوزه بیرده دانشگاه
یئتیریب لر کماله انسانی
.
سیزلر ئورگتدیز علم الابدانی
اولار ئورگتدی علم الادیانی
.
علم الابدان وعلم الادیانه
پایه دور دوره ی دبستانی
.
واردی بیر عده مهد کودک ده
ئورگدیر لر عزیز طفلانی
.
مهربان نهضتی معلم لر
چکدیلر درسه پیر و برنانی
.
چوخ بویوک زحمتیله بئیر عدّه ز
ئورگه دیر کُند ذهنی اعمانی
.
ایشه عاشق عمل ده عادل سیز
واردی رأییزده نمره میزانی
.
درسی کیم آلسا آرتوق ایسترسیز
گر چه اگنین ده واردی خلقانی
.
بیر سئورسیز کیم اولسا شاگردیز
پور دربانی ابن سلطانی
.
بیلورم کلمه سینده اینجیرسیز
سیزله قائم دی علمین ارکانی
.
سیزین عشقیز دی بیلمک ئورگتمک
آختارارسیز مسیر آسانی
.
خوش اولارسیز بیری سؤال ائتسه
بلکه تکرار ائده تقاضانی
.
انبیا شغلی دور معلملیک
ائدین هر لحظه شکر یزدانی
.
سوزومه ایسترم وئره زینت
بیر حدیث شریف نورانی
.
باخ کلام امامه دقتلن
تاپ ملوک الکلامه عرفانی
.
بویوروب کیم منه سوز ئورگتسه
ئوزینه عبد ائدوب دی مولانی
.
بوعلی دور کی ایلیوب معنا
آیه به آیه متن قرآنی
.
اوخوناندا ترانه ی توحید
او سرودین اولوب دی تکخوانی
.
سوروشون من دن هرسؤالیز وار
وار علی نین دلیلی برهانی
.
تانورام گویلرین یولین حتی
درد جهلین علی دی درمانی
.
ایستیور علمین ارزشین بیله لر
اهل عالم له یاری اعوانی
.
بیرده ایستیر معلمین تانیاق
علم شهرین جناب طاهانی
.
بو حدیثه تؤمل ایله میشم
گورمیشم سیزده اصل معنانی
.
سوز سوزی چکدی بو قلم ده بیزی
عرض تبریکیم اولدی طولانی
.
#اشرفی نین سوزی دگل لایق
شأنیزه چونکی چوخدی نقصانی
.
.
#ای_منه_ئورگه_دن_الف_بانی
#ترکی
#زبدةالاشعار #معلم #علی_اشرفی
نظر دهید