حالات علی اصغر (ع)
.
✍️ #زبدةالاشعار ✍️
.
🆔: @nohe_torki
.
سیفی اردبیلی
.
لایلای ننه قربان گوزوه صودامر اوغلوم
لایلای ملر اوغلوم
دوز بو گئجه نی بلکه سو ایچدون سحر اوغلوم
لایلای ملر اوغلوم
.
.
تاب ایله بیر آز گلمه بئله شیون و زاره
دلخسته هزاره
اوچ گوندی عطش سن بیلورم ائتمه اشاره
رحم ائت من زاره
دیرناقلاما پستانیمی چوخ سالما فشاره
وار منده نه چاره
یوخدور گوروسن سینه ده صود دن اثر اوغلوم
لایلای ملر اوغلوم
.
.
بیر گون واریدی غرقه ایدیم ناز و نعمده
مابین حرمده
ایش دوندی بو گون غوطه ورم غصه و غمده
دریای المده
سندی قنادیم قوش کیمی چنگال ستمده
جان دست عدمده
کرکس لر ائدوب لانه می زیر و زبر اوغلوم
لایلای ملر اوغلوم
.
.
اود وردی منیم خرمن اجلالیمه اشرار
بو لشگر غدار
باغلاندی سو یولاری اولوب مسئله دشوار
قالدى هامی ناچار
قوم اوسته قویار سینه سینی خورداجا قزلار
آه دل اولوب نار
بیلمم نه زمان قورتاراجاق بر سفر اوغلوم
لایلای ملر اوغلوم
.
.
گلدی سؤزه منلن بو فلک خیره سرانه
هی گتدی بهانه
آیدین گونومی شام ائلدی دست زمانه
قالدیم یانا یانه
اینجتمه منى صبر ائله دردون گله جانه
چوخ گلمه فغانه
توکمه سارالان صورتوه اشک تر اوغلوم
لایلای ملر اوغلوم
.
.
سندی گُهر عزّتیمون قدر و عیاری
بخت ائتمدی یاری
عمر آینه سین دوتدی بلا گرد و غباری
جان غصّه دچاری
داغلی دیلیمی سن ملیوب داغلاما باری
ای تشنه قناری
نیلر گوروم آخر بو قضا و قدر اوغلوم
لایلای ملر اوغلوم
.
.
رنگون سارالوبدور نه توانا نه قوا وار
نه راه رجا وار
فعلاً بو یامان درده نه بیر عقده گشا وار
نه منده دوا وار
نی مثلی سزلتوندا على شور و نوا وار
آهنگ عزا وار
یورما ئوزوی آغلاما ای خونجگر اوغلوم
لایلای ملر اوغلوم
.
.
مستور اولوب ابر غمیلن صورت ماهون
یوخ ذرّه گناهون
الدن گوزلیم طاقت آلور زلف سیاهون
سوزنده دی آهون
قالمش قوری دوشلرده او حسرتلی نگاهون
خالقدی گواهون
شرمنده آنوندا نه خطا وار مگر اوغلوم
لایلای ملر اوغلوم
.
.
#اصغریه_سیفی_اردبیلی
#اصغریه_شهادت #شب_عاشورا
#لایلای_ننه_قربان_گوزوه_صود_امر_اوغلوم
#ترکی
.
✍️ #زبدةالاشعار ✍️
.
🆔: @nohe_torki
نظر دهید