زبدةالاشعار

ایدنده عاشقه چشم محبّتله نظر معشوق #حسینیه #تائب_تبریزی

عاشق و معشوق
الطاف معشوق درحق عاشق
اشاره به حالات امام حسین (ع)
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
ایدنده عاشقه چشم محبّتله نظر معشوق
قیلار عشق عالمینده عاشقین شوریدہ سر معشوق
.
سالار باشین محبّت عالمینده اوزگه سودایه
اونون عزّتدن ال چکماقلیقین شایان بیلر معشوق
.
ایدر اوز خانمانیندن سالار کوه و بیابانه
گورنده عاشقی چوللرده سرگردان سوَر معشوق
.
حجازی نغمه سی دلده هوای نینوا باشدا
اونی ایلر قطار عشقیله شوریدہ سر معشوق
.
مخالفلر سالان یرده حصاره آرتروب شورین
اونی دشت همایون عراق اوسته چکر معشوق
.
نه یالقیز عاشقی بلکه هامی اهل و عیالینده
سُوَر خوف و خطرلی بیر سفرده همسفر معشوق
.
سالار باشین بلایه کربلاده عاشقین اول
بولر بو مبتداده واردی بیر خونین خبر معشوق
.
همین خونین خبر صدقینده قانه باتماقا گویا
وفالی عاشقه باغلاندیرار خونین کمر معشوق
.
نه یالقیز قانینه غلطان اوزین ایستر گوره بلکه
سوسوز قربانلیق ایستر اونلا یتمیش بیر نفر معشوق
.
او یتمیش بیر فدای دینی قربانگاه عشق ایچره
تماماً قوچ قوزی قربان دوتار مدّ نظر معشوق
.
وئرنده عاشق اکبر تک جوان ماہ رو قربان
اونون فرقینده ایستر آیت شق القمر معشوق
.
آلاندا ثانی نمرود اله تیر و کمان خوشلار
گوره ماهی کیمی عاشق الینده سود امر معشوق
.
بیچنده اول قوزی قربان بوغازین ظلم پیکانی
اونون آغ اُنّوگی قانه بویانسا خوش گورر معشوق
.
آتاندا عاشق اوجوندا سپهره سود امر قانین
او خون پاکیله دامان افلاکی بَزَر معشوق
.
بیلر شمشاد قدّی خم اولار قارداش باشی اوسته
بسان قدّ عاشق قامت چرخی اَیَر معشوق
.
قویاندا ماه آل هاشمیله یوز پوزه خورشید
بلالی زینبه ایلر قیامتدن خبر معشوق
.
چکنده نالۀ هل من معین شأنین بولوندورسون
عنایتله دیَر اول عاشقه لبیک لر معشوق
.
دولاندا قلبینون پیمانه سی قانیله مالامال
ائدر تقدیس او دلده گورسه اوخدان نیشتر معشوق
.
دگنده قلبینه اوچ شعبه لی اوخ کوی دلداره
آچار یول عاشقی ایلر یریندن باخبر معشوق
.
دوشنده قتلگاه کربلاده قانینه غلطان
اونا پیک پیامین لطف اوزیله گوندرر معشوق
.
دیر غم ایلمه یوخدور سنون یار و هوادارون
حبیبیم ناصر آختارما سنه نصرت ایدر معشوق
.
باخانادا گوزلری حسرت فراته العطش گویان
دیسم کوثر سویون باجادی قانه دوندرر معشوق
.
دیر باخما فراته ورد و ذکرون العطش ایتمه
سنه جنّتده مخصوص ایلیوبدور نهرلر معشوق
.
دیسه عاشق تَرَکتُ الخَلق طُّرّاً فی هواک اوندا
تجلّای جمال بی مثالین گوسترر معشوق
.
دیسه اطفالیمی قویدوم جمالون عشقینه باشسیز
اونا مرآت دلدہ حسنین ایلر جلوه گر معشوق
.
گورنده شاهد غیبی یوزین بی خود دوشرعاشق
ایدر منظور او احساساتی عشقیندن اثر معشوق
.
آچاندا گلشن جسمی یارائیله قزل گل لر
وفای عاشق جانبازینه احسن دیر معشوق
.
گورندہ عاشقین دشمنلرایلوب ظاهراً مغلوب
اونی باطنده ایلر صاحب فتح و ظفر معشوق
.
عطشدن بیر ساری گل تک سولاندا عارض عاشق
ایدر شمع جمالین سولموش اوزده شعله ور معشوق
.
ایدنده نقد جانین عاشق شوریده ارزانی
او بازار محبّت ده آغیر قیمت ویرر معشوق
.
سانار بیع و شرا بازاری نقد جان قبالینده
ایکی دنیانی بذل عاشق ایلر سربسر معشوق
.
او لب تشنه قتیل عشقی حیّ لا یموت ایلر
بیله قربان عشقی ایستمز زنده مگر معشوق
.
دیر قویمام قیام حشر تک دوشسون آدون دلدن
وفالی عاشقین هر ایل عزاسین تازه لر معشوق
.
او مقتول جفانین قانینی قویماز قالا یرده
آلار بیر گون او قانی اؤز الیله دادگر معشوق
.
گوگل آئینه سی امّت خیالیله کدر تاپسا
او زنگ حسرتی دست عنایتله سیلر معشوق
.
قوپاندا عرصۀ پر وحشت محشر او ساعتده
اونون اهل عزاسین خلق آراسیندن سچر معشوق
.
قویار تاج شفاعت فرقینه لطف تمامیله
اونی ایلر او عالی افسریله مفتخر معشوق
.
حقیقی عاشق اول تائب حسینه دوت رهِ تقوی
سنی تا اهل تقوائیله ایتسون مفتخر معشوق
.
.
#حسینیه #تائب_تبریزی
#حسینیه_مدح #حسینیه_شهادت #ورود_محرم
#ایدنده_عاشقه_چشم_محبتله_نظر_معشوق
#ترکی
.
✍️ #زبدةالاشعار ✍️
.
🆔: @nohe_torki

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters
Filter by Custom Post Type

دسته بندی درختی