ورود آل محمد بکربلای معلا
.
✍️ #زبدةالاشعار ✍️
.
🆔: @nohe_torki
.
مرحوم شعاع تبریزی
.
اردوی همایون شهنشاه مدینه
غم دشتینه گلدی غمه باغلاندی زمینه
.
.
سرلشکرینی محضره احضار ایلیوب شاه
امر ایتدی چوخور یرده ورون خیمه و خرگاه
.
.
فرمانده نیروی شه ملک امامت
فوراً ایلدی امر ملوکانیه طاعت
پخش ایتدی او جمعیّته بو حکمی او ساعت
یکسر دایانوب دوردی گلن جمله سراپا
فرمان مطاع شه کونین اولوب اجرا
.
.
اوّل قورولوب پادشهین خیمه سراسی
نصب اولدی اونون قبّه سی اوستونده لواسی
بیر بیر دوشنوب خیمیه شاهانه اساسی
غبطه یری وار ایتسه بو اجلاله سلیمان
هاردیدی سلیماندا بیله عزّت شایان
.
.
اقدام اولونوب خیمه و خرگاه دوشنسون
یاتسین دوه لر اهل حرم ناقه دن انسون
شاهانه اساسیله بلا دشتی بزنسون
فتیان بنی هاشم ایدوب جمله اراده
بیر بیر حرم عصمتی ایتسونله پیاده
.
.
بیربیرلرینه سبقت ایدوب شیر ژیانلار
جان نقدینی بازار محبّتده ساتانلار
مین مهر و محبّتله او مه پاره جوانلار
سویلردیله هر تک تکی بیر طفله مکرّر
آغوشیمه گل ای صدف عصمته گوهر
.
.
بیر یاندا دوشوب لشکر سلطان سلاطین
نصب اولدی اویان سمتده خرگاه خواتین
شهزاده لر اندیردی شهین خوردا بناتین
هر تازه جوانین بالا بیر قز قوجاقندا
بلبل دیه سن بس اوتوروب گل بوداقندا
.
.
ویر بیرجه امان ای یوزومه گوزدن آخان یاش
قوی باری ایدوم دلده کی گیزلین سوزومی فاش
اندیردی اوغولّار آنانی باجینی قارداش
اما نجه اَندیردیله یوخ شرحینه قدرت
بیر گوز گوره هیهات ایله شو کت ایله عزّت
.
.
تا اینکه چادرلار قورولوب اولدی مرتّب
وقت اولدی که اجلال نزول ایلیه زینب
محملدن اَنَن دمده او بانوی مؤدّب
سرعتله گلوب محضره سرداری حسینون
خم ایلدی زانوسین علمداری حسینون
.
.
جمع اولدی جوانلار خانمون دوره سین آلدی
بیکسلرین او چولده آرایه کسین آلدى
زهرا قزی تا آل علینون سسین آلدی
دولدوردی گوزون شوق شعفدن او دل آگاه
سسلندی سیزی زینبه چوخ گورمسون الله
.
.
صاقدان قولون اوّلده دوتوب شبه پیمبر
قاسمده دوتوب صول قولون آهسته مؤقّر
حایل اولوب اکرامیله عبّاس دلاور
اندیردیله نازیله او بانوی حجازی
رشگ ایتدى فلک گوردی بو اعزازیله نازی
.
.
غملندی قویاندا ایاقین دشت بلایه
اشگی خانمون آخدی گلوب شور و نوایه
گویا بیله عرض ایلدی شاه شهدایه
نه یردی بو یر گتدی منی درده حسینیم
گل وورما بو صحراده سراپرده حسینیم
.
.
قارداش بو یرین آب و هواسینده بلا وار
نه قلب آچلور بوردا گولور یوز نه صفا وار
قلبیم دویونور یوخسا باشمدا نه قضا وار
بیر سرّیده وار گوگلومون آرامین آلوبدی
زینب سنه قربان نیه رنگون سارالوبدی
.
.
بیرده دیدی چوخ گورموشم ای سبط پیمبر
دعوایه گیدنده آتامیز ساقی کوثر
خرگاهین ایدردی اوجا یرلرده مقرّر
علّت ندی سیز ایتدوز اونون عکسینه رفتار
امر ایتدون اولا نصب چوخور یرده چادرلار
.
.
افسرده گورنده باجیسین شاه شهیدان
رأفتله دیدی آغلاما گوز یاشیوه قربان
منله آتامون فرقی وار ای غمکش دوران
چون دشمنه دعواده آتام غالب اولاردی
قورسون اوجادا خیمه اودی طالب اولاردی
.
.
تشریح ایلیوم من نه دیلیله جریانی
مغلوب ایده جک لشکریمی دشمن جانی
صحرایه حسینین آخاجاق سو کیمی قانی
دنیا بویی دینه ویره جاخ رونق لایق
جدّیم گتورن شرعه اولار آهنین عایق
.
.
بو یر دولانوب روضۀ رضوان اولاجاقدی
هر گوشه سی مین رشگی گلستان اولاجاقدی
توپراقی هامی دردلره درمان اولاجاقدی
عاجزلسه هر دردین علاجینده اطبّا
بیر ذرّہ سی ایلر مین ایله درده مداوا
.
.
معبودیمه بوردا ایدرم تشنه ملاقات
حیرتده قالار صبریمه سکّان سماوات
کعبه یرینه بو یر ایدر فخر و مباهات
بو یردی نچون ظلمله ثارالله آخان پر
ثارالهی زهرا آغاران زلفه یاخان یر
.
.
یتمیش ایکی قربانه منادور بو بیابان
هر تک تکی دین اوسته ویرر جان باجی عطشان
قربانلاریم ایچره ولی وار بیر قوزی قربان
چون سوز عطشدن یاناجاق لبلری زینب
آغلار قویاجاق عالمی نسگللری زینب
.
.
صبر اولماسا بو ظلمه حقیقت علن اولماز
نخل ستم و جهل و جفا ریشه کن اولماز
گر سنده اسیر اولماسان الله دیَن اولماز
ویر ال اله منله ای آنام نور دو عینی
تا قوزیاخ عالمده باجی پرچم دینی
.
.
پایانه یتر شامده چون امر اسارت
قارداشیسز اوغولسوز ایده سن یثربه رجعت
من گیتمرم امّا وطن اولماز منه قسمت
گورسن دولانان یرلریمی بیرده وطنده
وورما یوزه سیلی یریمی خالی گورنده
.
.
ختم ایله «شعاع» طایر فکرون گینه آزدی
آغلاتدی قلم بسکه اسارت سوزی یازدی
آغلا دیمورم آغلاما بیر غم مگر آزدی
بیر عمرودی اودلور اورگون آتش حسرت
چاتدی باشا عمر اولمادی قبری سنه قسمت
.
.
#ورود_کربلا #شعاع_تبریزی
#اردوی_همایون_شهنشاه_مدینه
#ترکی
.
✍️ #زبدةالاشعار ✍️
.
🆔: @nohe_torki
نظر دهید