شهادت امام جعفر صادق (علیه السلام)
.
.
.
مرحوم حاج صادق تائب تبریزی
.
.
امام صادق ایدوب غمله ترک دنیانی
عزانشین ایلیوب اهل بیت طاهانی
.
باخوب بالالارینا صون نفسده یومدی گوزین
که یعنی گیتدوم ایدم درک جدّ و آبانی
.
یوموب او گوزلری که دائماً او گوزلریله
باخوب، لبیله، تلاوت ایدردی قرآنی
.
یوموب او گوزلری که برملا گورردی سالار
نه حاله اهل جفا ملّت مسلمانی
.
یوماندا گوزلرینی داده گلدی آل امام
اوجالدی گویلره آل رسول افغانی
.
بالاسی موسی جعفر ایدوبدی غسل و کفن
بقیعه حمل ایلیوب نعشِ علمه دریانی
.
جلال و عزّتیله باشلانان زمان تشییع
تجلّیّات محبّت یغوب احبّانی
.
جنازه نی گوتوروب شیعه لر ال اوستونده
فغان و شوریله دولدوردولار او سامانی
.
مدینه شهری دولوب بانگ وا امامادن
ایدوبله بیر دلیله هر بیری نواخوانی
.
دیردیلر تانیسوز کیمدی بو اولور تشییع
بودور او مدرسه ی فقهِ جعفره بانی
.
اوزی گیدور قالی باقی اونون گوزل فقهی
او فقه وار نه قَدَر واردی عالم فانی
.
او فقه دور بشریّته ده راحته برهان
او فقه دور وار اونون اتّصال قرآنی
.
هزار حیف او وفا روحی بیزدن آیریلوری
قویور یتیم بیزی شهر فقه سلطانی
.
جفا و ظلمیله خانه نشین اولان آقاوای
جهانی ترک ایلین دلده آه سوزانی
.
گل بهشتیدی، سولدوردی حیف باد اجل
حیات گلشنی اولدی لَهیب تالانی
.
او قان اولان اورگی لاله تک دونوب قانه
دوتوبدی قان آپارور دلده رنگ نعمانی
.
شکسته قلبیله زخم زبان آلوب آپارور
یارالی قلبیده زخم دل فراوانی
.
اولان اُلونجه شقیلر الیله ناراحت
گیدر منام ایده راحت او تحت غبرانی
.
اوزی گیدور، بو اورکلرده داغ لر قویوری
اودور توکولّه یوزه شیعه لر جگر قانی
.
سزادی شیعه لر اوز باشینه سپه توپراق
نه چون ویروبدیله الدن عزیز مولانی
.
یتیم شیعه لرین قالدی بوینی چیگنینده
ایشیق گونوز اولارا اولدی لیل ظلمانی
.
سریرده اوجالان نعشی شان و عزّتیله
دل ترابه قویار باش او فخر روحانی
.
او باش او تیره ترابین باشین اوجا ایلر
تاپار بقیع ترابی مقام اعلانی
.
بیله وجودی چتین چشم روزگار گوره
بُیوده مادر ایّام بیله دانانی
.
بقیع توپراقی احوالیوه اولا طوبی
جهاندا تاپدون عجب افتخار عظمانی
.
هدایتین گونیدور بو گلن، کسوفه دوشوب
گلور سنه ساری سینوندی مغرب جانی
.
شکسته حالیله الله قوناقیدور بو گلن
دوت احترامیله بو دلشکسته مهمانی
.
ضعیف جسمیله داغلار بویی اورکده غمی
آل اوز کناریوه بو جسم ناتوانانی
.
اماندی جان کیمی آغوشیوه آل اینجیتمه
یارالی قلبیله مسموم جان و جانانی
.
کنار قبریده تابوتینی قویوبلا یره
گوز ایستوری گوره حال امام موسانی
.
گوره نه حالتیله ال اوزور آتاسیندان
قویور مزاره ایله گنج علمه دارانی
.
دم فراق گلوب وصل گوسترور پایان
چخور الیندن آتانون وصال دامانی
.
قالور قیامته دیدار، الدن ال اوزولور
گوزونده موج وورور اشک چشم دریانی
.
تراب تیریه آغلار گوزیله تاپشوردی
جوار حضرت باقرده کنز ایمانی
.
آلوب کناره بالاسین آتا، محبّته باخ
یاتوبلا اوردا گورونجه قیام کبرانی
.
آتا مزارینه بیر باخدی نازنین گوزلر
دولوب بولود کیمی یاغدوردی اشک بارانی
.
سیلردی گوزیاشینی شیعه لر محبّتیله
ویرردیلر اونا مین مهریله تسلّانی
.
گلیدی شیعه لر ای کاش کربلا چولینه
گوریدیلر او بیاباندا شور و غوغانی
.
گزوب او قانلی بیابانی بیر چوخور یرده
گوریدیلر تن مجروح شاه عطشانی
.
تاپوب ویرِیدیله تسکین امام سجّاده
آلوب آرایه محبّتله اول معزّانی
.
سیلِیدیلر او غریب آغلیاندا گوز یاشینی
آلیدیلر اورگیندن غم فراوانی
.
#صادقیه_شهادت
#امام_صادق_ایدوب_غمله_ترک_دنیانی
#تائب_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید