شهادت حضرت علی (ع)
..
..
مرحوم خوندل تبریزی
..
..
سالدى یوزینه شمس فلک پرده خجلت
مستور اولالی چهره خورشید ولایت
..
..
هر قدر بو وضعیله سالا گوی یره سایه
عزتده نقدر عالم خاکی تاپا پایه
صحرای نجف مفخر اولار عرش خدایه
چون اوردا یاتوب مظهر خلاق جلالت
..
..
خلّاق او گون که یارادوب کون و مکانی
اوّل آیروب نیّر افلاک هدانی
بو کارگه خلقته شخصیّت ثانی
البته علیدور که سچوب خالق عزّت
..
..
آغاز سحر آخر شب مسجد کوفه
بیر تیغ جفا دگدی او مولای رئوفه
قان آخدی رُخ مهر وفا دوشدی کسوفه
ترتیب عوالم پوزولوب اولدی قیامت
..
..
حق جلوه لنوب بسکه او حق بین نظرینده
تأثیر ایلیوب زهر جفا زخم سرینده
جانانینه جان ویردی او ضربت اثرینده
خاموش اولونوب پرتو مصباح هدایت
..
..
پیرایه سیدی نام على عرش برینون
یوخ پایه سی بو پایه ده ایمان و یقینون
عالم متحیّردی جلالینده علینون
هیهات نظیرین گتورر عالم خلقت
..
..
عاجزدی قلم رشتۀ توصیف و ثناده
بیر کیمسه ده اولماز اولا بو خارق عاده
تابوتینون اوّل طرفی گیتدی هواده
آخر طرفیندن حسنین ایتدی حفاظت
..
..
بو نوعیله تقدیر ایلیوب خالق بیچون
بیر دور منظّمده گزر گنبد گردون
بی علّت على اولمادی توپراقده مدفون
ایجاب ایلمیشدی بیله بیر امری مشیّت
..
..
بیرده بیر على دفن ایلدی سیّد سجاد
مانندینی مشگلدی گوره دیدۀ ایجاد
پیغمبره مظهر شرف عترت امجاد
اکبر آدینا ختمدی طومار وجاهت
..
..
باتمیشدی او پروانه شرارینده حسینون
عفت اودی دفن اولدی جوارینده حسینون
اکبر یاتا لایقدى کنارینده حسینون
مشکلدی آتا ایله اوغولدان کسه الفت
..
..
اصغر آدی بیر لطفیله معناده اوجالدی
دنیانی او عزّت او شرف حیرته سالدى
گل پرپر اولان غنچه نی آغوشینه آلدى
محشرده اولار جدّینه عنوان شکایت
..
..
تر اوسته ده بیر شیردل شرزه دوشوبدی
دریایه هراسیندن اونون لرزه دوشوبدی
اوخدان یارالی پیکری بیر طرزه دوشوبدی
گل جسمینون ابعادینه یوخدور سر و صورت
..
..
سقادی ویروب ظلمیله جانانه سوسوز جان
دین اوسته باتوب قانه دوشوب با لب عطشان
معنای مواساتی ایدوب عالمه اعلان
بیر گوز ایکی الدی اونون ایثارینه آیت
..
..
گلزار حسندن ایکی نورس گل رعنا
بیر گلشنی ایتمیشدی طراوتلری زیبا
خاریله ایله پرپر ایدوب لشکر اعدا
خندان گله بنزر نه صفا وار نه طراوت
..
..
زهرا قیزی گنجینۀ غم زینب کبری
تا گوردی شهی بی مدد و یاور و تنها
گلدی ایکی قربان گتوروب ایتدی تمنّا
قارداش بو ایکی اوغلوما ویر اذن شهادت
..
..
لیلانی سر افراز ایلیوب خدمت اکبر
وار حقّى سریّه اولا محزون و مکدّر
کلثوم توکوب عارضه گوزدن در و گوهر
گوردی یخلوب سرو کیمی بیر اوجا قامت
..
..
قانلی بدنه ایتدی دُر اشکینی شاباش
اسرار دلین ایلدی بو سوزلریله فاش
بو حاله دوشونجه سن ئولیدی باجون ای کاش
بو اهل جفاده یوخوموش رحم و مروت
..
..
..
#حیدریه #خوندل_تبریزی #حیدریه_شهادت #ترکی #زبدةالاشعار
نظر دهید