مصائب اهل بیت علیهم السلام در شام
.
.
مرحوم راجی تبریزی
.
.
شیعه بو ایجاد عالمدن اطاعت دور غرض
عالم و آدم وجودوندان عبادتدور غرض
.
.
ایستدی صانع ایده مصنوع صنعین آشکار
ایلدی غیب عالمیندن بو شهودی اختیار
بیر بیله خلقی عبث خلق ایتمیوب پروردگار
کی بو کثرتدن ظهوری سرّ وحدتدور غرض
.
.
ایلدی آیینۀ عالمده نور حق ظهور
تاپدی آیاتینده صورت معنی الله نور
بوندان آرتخ چشم حق بینه دَگل آیت ضرور
سر بسر بو اَنفُس و آفاقی آیتدور غرض
.
.
عالم بالا ده ایدل چون هما پرواز سن
اولما طالب جیفۀ دنیایه سن شهباز سن
آرزوی حرص و آزون ترک قیل بیرآز سن
حبّ دنیای دَنی دام ندامتدور غرض
.
.
جمله منصبلردن عالیدور موّحد منصبی
اولا بولمز هیچ موحّد چون بنی آل نبی
یاخشی کشف ایتدی حسین بن علی بو مطلبی
گوردی اقرار شهاتدن شهاتدور غرض
.
.
ایستدی جان ویرمگیله حقّی اثبات ایلسون
تا موحّدلر اونون حقّین مراعات ایلسون
نیزه باشندا کسیک باشی مناجات ایلسون
بیر مناجاتی که قرآندان تلاوتدور غرض
.
.
گه تنور اولدی او باشون مسکنی گه کُنج دیر
اهل دیری آخرالامر ایلدی آخر بخیر
نیزه لر اوسته ولایت به ولایت قیلدی سیر
بو هامی سیرندن اثبات ولایتدور غرض
.
.
شامه داخل ایلینده عترت پیغمبری
دیمرم هرگز یوخیدی باشلاریندا معجری
بو قدر بیل کی یوزه پردیدی اوز گیسولری
پی آپار گور بو اشارتدن نه حالتدور غرض
.
.
شامون اهلی اللرینده تار و نای و چنگ و دف
رهگذرلرده تماشایه دوزولموش صف به صف
کچدیلر هر دسته دن چون عترت شاه نجف
گوردولر قلب اسیراندا اذّیت دور غرض(1 )
.
.
زینب کبرا گوروب شام اهلی ایلوب ازدحام
اهلبیته ایتمگه ایذا مصمّم دور تمام
سویلدی باخمون بیزه شرم ایلیون ای اهل شام
کی بو باخماقدان رسوله هَتک حرمتدور غرض
.
.
حال آل اللهی بیربیر گر تفکّر ایله سن
دمبدم جاری یوزه اشک تحیّر ایله سن
شیعه احوالات شامی گر تصوّر ایله سن
چوخ بیوک مِحنتدی چوخ آرتخ مصیبتدور غرض
.
.
آلدیلار بیر گون خبر بیمار بی آرامیدن
بیر بیله مِحنت سیزه یوز ویردی بو ایّامیدن
هانسی آرتخ اولدی ،حضرت شکوه قیلدی شامیدن
کلمۀ الشّامیدن درد شماتت دور غرض
.
.
راوی عرض ایتدی سنه قربان من ای عالی مقام
ایتدیلر داخل نه وقت شامه سیزی قوم ظلام
دیدی ای راوی بوقت صبح امّا تا بشام
شامده گزدیردولر هر نوع ذلّتدور غرض
.
.
ویردولر آخرده بیر ویرانه ده منزل بیزه
نه در و دیواری نه سقفی اولا حایل بیزه
بیر دقیقه استراحت اولمادی حاصل بیزه
بیر سکینه یاتمیش اوردا ایندی راحتدور غرض
.
.
فرض دور بو غمده ناله غمده و بومیه
دُرّ اشکون «راجی» قات بو گوهر منظومیه
آغلا یازدوقجا مصیبت نظمین اول مظلومیه
گوزیاشی سرمایۀ شوق محبتدور غرض
.
(1) اصل شعر
هامونون قلبینده گوردیله اذیّت دور غرض
.
.
#خرابه_شام #راجی_تبریزی #ترکی #زبدةالاشعار
نظر دهید