معراج رسول اکرم(ص)و اشاره به مقام حضرت زهرا(س)
.
✍️ #زبدةالاشعار ✍️
.
🆔: @nohe_torki
.
ستوده زنجانی
.
.
قویدی حق فرق رسول اللهه الطافیله تاج
گوره آیات حقی ایلیه عرشه معراج(۱)
.
صاحب رفرف عزّت او رسول مدنی (2)
چاتدی بیر نقطیه جبریل دایاندی علنی
.
.
عرض ائدوب حضرت طاهایه گله بولمم من
بو اجازه سنه واردی که عروج ایلیه سن
گئدسن قدرت معبودی یاخوندان گوره سن
سیز منه بنذمیسوز عزت شایانوز وار
نور الله سان اودور عرشیده اسکانوز وار
.
.
مصطفی گئتدی گزوب عرشیده اسکان ائلدی
حیّ داور اونی اؤز خوانینه مهمان ائلدی
قدر پیغمبری عالملره اعلان ائلدی
بو ضیافتده پیمبر ائشیدوب نچّه کلام
وئردی معبودی اونا عرشیده بو نوعی پیام
.
.
یامحمد سنه خاطر یارانان دنیادی
مرتضی نوری ده سندندی شه والادی
فاطمه نوری ده سندندی که لایحصادی
نور واحدسوز هاموز، نور دو چشم ثقلین
اولدی بو نوریدن ایجاد، دو نور حسنین
.
.
ای حبیبیم بو بشارتدی ائشیت بو سخنی
زینت خلقته خلق ایلمیشم فاطمه نی
مرتضانی، سنی مِن جمله حسین و حسنی
شأنینه عصمت کبریٰ دئیلن فاطمه دی
اونون هم کفوی علی، صاحب کشف الغمه دی
.
.
روز محشرده سراسیمه دی مردان و زنان
پی اعمالی اولار وحشتلن پیر و جوان
فاطمه وارد اولار صحنیه با تخت روان
امتین، فاطمه نین شأنینی اوندا بیله جاق
شافع محشر اوگون حشره سواره گله جاق
.
.
امتون، بیلمیه جاق فاطمه نین قیمتینی
اوردا معلوم ائدرم حرمتینی عزتینی
ائتموشم هدیه اؤزوم عفتینی عصمتینی
من بتوله گوره جناتیمه زینت وئررم
کیمی زهرا سئوه من جنتی خلعت وئررم
.
.
لب آچا فاطمه من ناری گلستان ائدرم
اودی خاموش ائلیوب چشمه ی حیوان ائدرم
دوندروب دوزخی بیر آنیده رضوان ائدرم
یازموشام فاطمه نین مهرینه من رضوانی
ایستسه فاطمه رضوان ائلرم نیرانی
.
.
روز محشرده یارانموش هامی حیران اولاجاق
رنگ رخساری لری خوف خدادن سولاجاق
هول محشردن او دم قلبلره قان دولاجاق
دولانوب باشی بیر عده سوکولوب سینه لری
ال چیخوبدی کورگیندن آلا برگ خطری
.
.
یوخدی نامحرم او گون لذت دنیا یوخدی
شهوت و جاه و جلال عزت دنیا یوخدی
سلطنت زور دئمه ، قدرت دنیا یوخدی
کلّ مخلوقیم اوگون ایستی گون آلتیندا پیشر
جگری نعره وورار سو، دیلی آغزیندا شیشر
.
.
ای پیمبر بونی اعلان ائله کلّ ملله
دعوت ائت مردمی سن فرشیده صالح عمله
دین و قرآنه عمل ایلینه واردی صله
نفس انسان سالار عالملره جنگ و جدلی
دئنن ائتسونله حفاظت گوزونن،نفسی،الی
.
.
اَلدی،گوز، سایر اعضا هامی شاهددی سنه
دانیشار اوردا هر اعضا گله جاقدور سخنه
گوزله ایمانیوی سن ساتماگیلان کم ثمنه
ائله کی مشگله قالدون دئگیلن یازهرا
یولووی هر یره سالدون دئگیلن یازهرا
.
.
صحنه ی محشری وَهم عالمی بیله یازارام
فاطمه مهرینی عشاق اورگینده قازارام
روز محشر خانمون اولماسا لطفی آزارام
لطفینه گوز تیکوب الان دییروک یازهرا
روز محشرده هراسان دییروک یازهرا
.
.
صفِ حقّه دوزولنلر دییه جاق یازهرا
الی الدن اوزولنلر دییه جاق یازهرا
اشک چشمی سوزولنلر دییه جاق یازهرا
بو سؤز الله سوزودی شافع محشردی خانم
ملتین دادرسی امته یاوردی خانم
.
.
غم زهراده یانانلار دییه جاق یازهرا
دؤش آچوب سینه ورانلار دییه جاق یازهرا
بابا، قانه بویانانلار دییه جاق یازهرا
بیز حسین عاشقیوک امر ائله یا اودّا یاناق
یا ترحّم ائله بیر یول باشیوا قوی دولاناق
.
.
باش یاران قانینه غلطان دییه جاق یازهرا
سینه زن،هیئتی، یکسان دییه جاق یازهرا
نوحه خوان،شاعر و دربان دییه جاق یازهرا
فاطمه خاطرینه هفته ده هیئت گزیروخ
بو عزاخانه لری هی سیلیروخ هی بزیروخ
.
.
نطفه سی پاک اولان انسان دییه جاق یازهرا
انس و جنّ، حوری و غلمان دییه جاق یازهرا
فاطمه پیروی نسوان دییه جاق یازهرا
او خانم کی اؤزونی حفظ ائده نامحرمدن
اونی زهرا قوتارار یوم جزا هر غمدن
.
.
بوذر و میثم و سلمان دییه جاق یازهرا
عاشق عترت و قرآن دییه جاق یازهرا
حشریده ساقی عطشان دییه جاق یازهرا
شهدا بزمینه من شمع شبستانم آنا
او جوانلیقدا صولان رنگیوه قربانم آنا
.
.
شهدا یوزلری قانلی دییه جاق یازهرا
اسرا پیر و جوانلی دییه جاق یازهرا
زینبی قدی کمانلی دییه جاق یازهرا
آنا قارداشیم حسیندن صورا قدّیم بوکولوب
اوجا داغلاردان آغیر اوستومه غملر توکولوب
.
.
انبیا صف به صف اوّلده دییر یازهرا
اوصیا ازبر ائدوب دیلده دییر یازهرا
مجتبی زهر جفا الده دییر یازهرا
آنا زهریله جفادن جگریم یاندی آنا
پیر و بُرنا سنی گوزلور هامی گریاندی آنا
.
.
یارالی پیکر عریاندا دییر یازهرا
اوخ دگن سینه ی شان شاندا دییر یازهرا
کسیلن باشی لب عطشاندا دییر یازهرا
یدّی ضربتله قفادن آییروبلار باشیمی
قوللاری دوشدی آنا دوغرادیلار قارداشیمی
.
.
او قیامتده پیمبرده دییر یازهرا
فاطمه سویگلی حیدرده دییر یازهرا
دیل آچوب محسن و اصغرده دییر یازهرا
مصطفی سویلر اودم ای گوزومون نوری بالا
امتین دادینه یت ایله شفاعت بولارا
.
.
بیر خانم کی بو قدر عزّتی وار شوکتی وار
اولوب اللهه حبیبه او قدر حرمتی وار
شافع یوم جزادور سؤزونون قیمتی وار
حقّینی آلدیلار الدن اورگین داغلادیلار
هر یره دوندروب اوز چاره یولون باغلادیلار
.
.
سُؤنوردی فدکین مدرکینی آلدی خانم
یولونی منزله خلوت کوچه دن سالدی خانم
بولمورم ثانینی گوردی نه حالا قالدی خانم
دئدی زهرایه نه علتدی بئله مسرورسان
ای پیمبر قیزی وجهین دئمه سن مغرورسان
.
.
عصمت الله او زمان نطقه گلوب ائتدی خطاب
نیّت پستیوه ثانی ائدوسن ایمدی شتاب
صورتیندن یاغوری نخوت و نیرنگ و عتاب
فدکین مدرکین آلدیم گئدیرم منزلیمه
باعث و بانی سن اولدون بو قدر مشگلیمه
.
.
دئدی ثانی سَندی وئر منه رؤیت ائلیوم
منده بوبکر ائلین خیر ایشه شرکت ائلیوم
ذیلین امضا ائلیوب مُهرینه دقت ائلیوم
فدکین صاحبی سنسن بونی تأیید ائدرم
متنی که ثبت اولونوبدی اونی تأیید ائدرم
.
.
اعتماد ائتدی او نامرده او بانوی جهان
سَندی وئردی ولی قلبینی دوتدی ضربان
چاتدی مقصودینه ملعون وروب زخم زبان
تا قباله الینه دوشدی اونی پاره لدی
دل زهرانی دوباره او دَنی یاره لدی
.
.
دئدی زهرا کیشیده غیرت اولار سؤز دانیشار
مدّعی دینه اولان هر سوزونی دوز دانیشار
نه که مکریله یالان سوزلری یوزیوز دانیشار
سن اؤزون امت پیغمبره حامی بولوسن
حقّیمی غصب ائلیوب طعنه ورورسان گولوسن
.
.
غیظه گلدی الینی قوزادی اول مرد پلید
وردی بیر سیلی ، گل اوزده اثری اولدی پدید
یخیلوب ضربت سیلی دن او بانوی وحید
گوزیمه اولدی مجسّم بو قضایا علناً
نئجه شرح ایلمیوم محض بکا مطلبی من
.
.
دوروب اگلشدی خانم تکیه ائدوب دیواره
گوزونون یاشی آخوب سیلی دگن رخساره
حسنی باغرینا باسدی دیل آچوب گفتاره
ننون ئولسون بالا بو معرکه ده قورخدون اوغول
آناوی دوگدیله خلوت کوچه ده قورخدون اوغول
.
.
گل اوغول سینمه بیر لحظه قولاق وئر سوزومه
بالاجا اللریوی چک سنه قربان گوزومه
یانورام من سارالان صورتیوی قوی یوزومه
آغلاما سیل گوزوی منزله الآن گئدروق
دوزه لر حالیم اوغول بو کوچه نی ترک ائدروق
.
.
جان حسنجان بئله توکمه یوزیوه گوزیاشوی
نگران اولما بالا قوی سینم اوسته باشوی
سنیلن زینبی کلثومی حسین قارداشوی
فاطمه گلشنینون گرچه سارالمیش گولوسوز
اسداللهدی بابان حیدره سیز سویگولوسوز
.
.
گوزل اوغلوم آتاوین عزتی وار غیرتی وار
جنگیلر شیردی حیدر قولونون قوتی وار
ذوالفقاریله علینون بولوسن شهرتی وار
سن آنان فاطمه نین جانی حسن سرّیدی بو
دئمه ووردی آناما کوچه ده سیلی او عدو
.
.
مرتضی خانه نشین اولدی قرارین غم آلوب
حیدرین ایمدی یامان گونلریدی ائوده قالوب
آتاوین دردی حسنجان آناوی درده سالوب
بولسه حیدر دوگولوب فاطمه قلبی سیخیلار
ذوالفقاره ال آتا دین ائوی یکسر یخیلار
.
.
اورگین دردینی زهرا ننون آلسون حسنیم
صبر ائله یوز گوزومون دردی آزالسون حسنیم
نه گلوب باشیمه، قوی سینه ده قالسون حسنیم
بولورم بو کوچه اوغلوم سنی چوخ یاندیراجاق
بورا دوشدوقجه یولون قلبیوی اودلاندیراجاق
.
.
یولوی گوزلوری زینب سنه قربان دو گئداخ
گئتمساق زینب نالان گلر الآن دو گئداخ
نیلیاخ مطلبی گر بولسه، حسینجان دو گداق
دوت الیمدن دور ایاقه یری بیر لحظه یواش
قارداشیم، باجیلاریم گل یوزیوی گورمیه کاش
.
.
چیگنیمه تکیه ائله یول یری آهسته ننه
من سنه حائل اولوم سنده کمک ایله منه
قورخموشام منده دیزیم تیتریری روشندی سنه
ائوه چاتساق سنیچون یئر گتوروب ساللام آنا
آز قالوب منزله صبر ائت قاداوی آللام آنا
.
.
مطلبی ختم ائلورم گرچه مصیبت قالوری
شیعه نون قلبینی درده بو مصیبت سالوری
یازما هر مطلبی قلبیم دئمه الهام آلوری
سوز«ستوده»اولا تا واردی جهان باقی قالار
خادم آل عبا مزدینی زهرادن آلار
ـــــــــــــ
(1) سوره اسرا آیه 2 : سُبحانَ الذی اسری بعَبده ِ لیلا ً مِنَ المَسجد ِ الحَرام ِ الي المَسجد ِ الاقصَی الذی بارَکنا حَولهُ لنريهُ من آیاتنا انّهُ هُوَالسَّمیعُ البصیرُ ”
” پاک و منزه است خدایی که بنده اش ( محمد ) را شبانه از مسجد الحرام به مسجدالاقصی که پیرامونش را برکت داده ایم ، سیر داد تا از نشانه های خود به او نشان دهیم . همانا او شنوا و بیناست . ”
(2) سوره الرحمن آیه 76 : مُتَّکِئينَ عَلي رَفْرَفٍ خُضْرٍ وَ عَبْقَرِيٍّ حِسانٍ
در حالتی که بهشتیان بر رفرف سبز و بساط زیبا تکیه زده اند.
.
.
#پیامبراسلام
#فاطمیه_مدح
#فاطمیه_شهادت
#قویدی_حق_فرق_رسول_اللهه_الطافیله_تاج
#ترکی
.
✍️ #زبدةالاشعار ✍️
.
🆔: @nohe_torki
نظر دهید