خروج از مدینه
گریز به شهادت حضرت ابوالفضل (ع)
..
..
..
..
مرحوم نخستین اردبیلی
..
..
..
..
مدینه دن چخوب حسین نه غملی کاروانی وار
گئدور دیار مکّیه قوجاسی وار جوانی وار
..
..
..
..
اَوَل گلوب یوزون قویوب پیمبرین رواقینه
اوجالدوب آه و ناله سین فغانین عرش طاقینه
دئدی بابا منایه گل حسینوون سراغینه
او مرغه بنذیور حسین مناده آشیانی وار
..
..
..
..
آلوب قوجاقه زینب ئوز آناسنون مزارینی
توکوبدی گؤزیاشی قویوب مزارینه عذارینی
گوزوم یاشیلا قبروون یووم گئدوم غبارینی
منیم تک هانسی بیر قیزون آنا، غم نهانی وار
..
..
..
..
یواش یواش او کاروان گئجه نون عالمی گئدور
بلا چکن خانمانلارین ئوره کده وار غمی گئدور
آچوبدی رهبر اوستونه وزیری پرچمی گئدور
باخاندا گوردی رهبری باشیندا سایه بانی وار
..
..
..
..
اول که محمله مینوب قبیله نون اوشاقلارى
یخیلمیوبدی ناقه دن یارا دگول ایاقلاری
سوسوز دگول یارالانا سوسوزلارون دوداقلاری
سو ایستین آلور ایچور یانیندا پاسبانی وار
..
..
..
..
بیوک کچیک سوار اولوب یا ناقیه یا محمله
ئوره کده مین خیالیلن گئدور او غملی قافله
إئله گئدور او کاروان بیریده گلمیور دله
نه سس صدا، نه آغلاماق، نه بیر یره گمانی وار
..
..
..
..
یتیشدى کعبیه حسین جلالیلن سپاهیلن
طواف کعبه ایلیه رعیّتی او شاهیلن
یتوره حجّی آخره چخا جلال و جاهلین
نه گوردی بیت الاعظمون خطرلی داستانی وار
..
..
..
..
دئدی الهی شاهد اول گئدوم او وعده گاهیمه
چوخور یره خِیَم ووروم مکان وئروم سپاهیمه
دوزوب یزید لشگرین، او چولده شاهراهیمه
نه وار حسینه بیر امید نه آیری بیر مکانی وار
..
..
..
..
چخوب او غملی کاروان گئدور دیار مقصده
نه کعبه ده قالانمادی نه قالمادی مدینه ده
گئدور محیط عشقینه حسین سنیق سفینه ده
زنان اوشاق بیوک کچیک بشیکده بی زبانی وار
..
..
..
..
غرض یتوب مناسینه چوخور یره خِیَم ویروب
دوشوب او دشت غمده بیر ساقا سولا قدم ویروب
درِ خیامه قارداشی گتوردی بیر علم ویروب
دئدی بو چولده شاهیمون غریبه سازمانی وار
..
..
..
..
ساقیندا دورت برادری سولوندا اوغلی اکبری
باشیندا خوردا قزلارین قرا دگولدی معجری
مدینه دن چخاندا کی گؤروبله شاه اطهری
گؤرن دئدی حسین گلور یانیندا مهربانی وار
..
..
..
..
یواش یواش دولوب او چول سپاه بی کرانیلن
پیاده یا سواره دور گلور دوان دوانیلن
هره سی بیر لباسیلن ، هره سی بیر نشانیلن
طبیل چالور گلن قشون مگر قشوندا سانی وار
..
..
..
..
کنار نهر علقمون قشون آلوبدی دوره سین
حسینه یوخدی بیر نفر گلوب حمایت ایله سین
قالوب ئوزوک قاشی کیمین او شه اراده نیله سین
نه بیر نفر کمک گلور ، نه بیر کسه گمانی وار
..
..
..
..
بش آلتی گون گئچوب عدو ، ره فراتی باغلادی
سو اولمادی اوشاقلارین نواسی قلبی داغلادی
رقیّه جام آلوب اله گزوب خیامی آغلادی
نه ایچمگه سو اولمادی نه قالماقا توانی وار
..
..
..
..
صدای العطش چخوب او چولده عرش طاقینه
یتیشدى العطش سسى، ابوالفضلون قولاقینه
رقیّه گتدی مشگینی قویوب اونون قباقینه
دیدی عمو علاج ایله سوسوزلارین فغانی وار
..
..
..
..
قوجاقه آلدی اول قیزی قویوب دوداق دوداقینه
قولونی سالدی بوینونا بی سوز دئدی قولاقینه
دئدی سو حاضر ایلرم رقیّه مون قوناقینه
عمون گئدر سو آلماقا نقدری جاندا جانی وار
..
..
..
..
سو حاضر ایلرم قیزیم گر اولسا جان بهاسینه
نه قیمته تمام اولا گتورّم آل یاسینه
تلاش ائدر عموم سنون بو دردوون دواسینه
اگر چه نهر علقمون نقدری دیده بانی وار
..
..
..
..
محبّت اهالی تز دوشر، محبّتین فشارینه
علاجی یوخدی ،عاشقین، دوشر کمند یارینه
سوسوزلوقى رقیّمی سالوب بو غم حصارینه
سودان ساری سیزیلداشور نقدری همزبانی وار
..
..
..
..
دئدی سیزی گورنده کاش، عمون ئولیدی آی بالا
نیه گتوردون اصغری عمومی سالدی بو حالا
او گوله بندیور قالوب سوسوز باشی آخوب دالا
بو گلشنون بو گوللرون وفالی باغبانی وار
..
..
..
..
گئدوب اجازه اخذ ائدوب او شاه خوش صفاتیدن
سوسوزلارا سو آلماقا او قان اولان فراتیدن
فراته یوز قویوب گئده الین چکوب حیاتیدن
عجب سوسوز بالالارین سخالی قهرمانی وار
..
..
..
..
فراتی آلدی سو یولون آچوب او شیر نامدار
سو مشگینه سو دولدوروب اولوب فراتیدن کنار
سالوبدی مشگی چگنینه عقابینه اولوب سوار
فراتین اوسته نچّه مین ستمگر اوخ آتانی وار
..
..
..
..
خیامه گلمگه یولون سالوبدی نخل زاریدن
نه ظلم اولوبدی بیلمورم قولی کسیلدی باریدن
ایله دونوب غبار اونی گورونمیور غباریدن
تاپانمیور خیامه یول گوزونده لخته قانی وار
..
..
..
..
هواده بیر سه شعبه اوخ آچوبدی پر دوشوب یولا
نه بیر ساقا چکور ئوزون نه ایسته مور چکه سولا
قولون ویروب قباقینه او اوخ دگه کسوک قولا
گلوب دگوب سو مشگینه نجه قوی کمانی وار
..
..
..
..
سومشگینه دگنده اوخ سوئی ترابه پخش اولوب
سو یرینه سو مشگینه یارالارین قانی دولوب
دئدی خیامی ترک ایله چمن سارالدی گول سولوب
سوسوز لوقا بو ایستیده ده مگر کیمون توانی وار
..
..
..
..
سودان اولاندا نا امید سینه ده دوندی پرچمی
دیدی آماندی تیترمه باجیمون آرتماسین غمی
یخیلما پرچمیم یره حسینوون یوخ همدمی
سَنان ألینده ویرماقا منی گلور سِنانی وار
..
..
..
..
عقابه یوز دوتوب دئدی منی آپارما خیمیه
رقیّه قورخورام گَله عمو دیه سو ایستیه
سو پایلیان مگر اولار سوسوزلارا سو ویرمیه
گورن دیه سو مشگینین سوئی که یوخ نشانی وار
..
..
..
#خروج_مدینه #نخستین #ترکی #زبدةالاشعار
نظر دهید