زبانحال حضرت زهرا (س)خطاب به امیرالمؤمنین(ع)
.
.
مرحوم رجایی تبریزی
.
.
عمریمون آخریدور آیریلورام سندن عم اوغلی
گل حلال ایله اگر اینجمیسن مندن عم اوغلی
.
.
ناخوشام سن بولوسن دردیمه یوخ چاره طبیبیم
اولدی چوخ غصّه بو آز عمرده دنیاده نصیبیم
هر غمیم بیر طرفه یوز چُووروب گیتدی حبیبیم
تنگ اولار بلبله گل اولسا خزان، گلشن عم اوغلی
.
.
آتامون فرقتی ظاهرده منی سالدی بو حاله
اولدی باعث بو قَدَر محنت و اندوه و ملاله
آتش غمده وجودوم اَرِیوب دوندی هلاله
باشدا زلفوم آغاروب دور شرر غمدن عم اوغلی
.
.
سن بولورسن منی بسلردی نه عزّتله پیمبر
راضی اولمازدی اولا فاطمه بیر لحظه مکدّر
تاپشوروردی قیزینی ئومّته دنیاده مکرّر
حیف اولا امّتی ال چکمدی ظلموندن عم اوغلی
.
.
منه آندوردی که بیر بَزم سقیقه قوراجاقلار
حقّمی اَلدن آلوب محنتیمی آرتوراجاقلار
فدک اوسته من مظلومِیَه سیلی ووراجاقلار
اولاجاق رنگ رخوم، رنگ گل سوسن عم اوغلی
.
.
قویمادی اهل مدینه منی راحت اوز ایویمده
اولمادی آغلاماقا بیرجه فراغت اوز ایویمده
گوردوم ایلولّه من زاره اهانت اوز ایویمده
منده صحرالری ایتدیم اؤزومه مسکن عم اوغلی
.
.
حَسَینینی گوتوروب چوللری من مسکن ایدردیم
باباما چولده قوروب بزم عزا شیون ایدردیم
نوحه ایلردی حسن منده نوا دلدن ایدردیم
بیر آغاج کولگه سی اولموشدی منه مأمن عم اوغلی
.
.
اهل کینه آغاجی کسدی بیزی زحمته سالدی
اود دوتوب یاندی دلیم حسرت اَلیم سینه ده قالدی
گون قباقینده حسین و حسنیم سولدی سارالدی
ایمدیدن سینه لری اولدی غمه مخزن عم اوغلی
.
.
آتام ئولدی اؤزومی هامّی بلایه سپر ایتدیم
من پیمبر بالاسیدیم نجه گور عزته یتدیم؟
کمکیم اولمادی ناچار اؤزوم مسجده گیتدیم
مُلکمون بلکه عدو اَل چکه غصبندن عم اوغلی
.
.
سنه واضحدی عم اوغلی نَقَدر ظلمه دایاندیم
حق دانیشدیم ولی ناحق یره من قانه بویاندیم
قویدی دشمن در و دیوار آراسندا یارالاندیم
باعث اولدی بالامون سقطنه بطمندن عم اوغلی
.
.
بولوسن هانسی ستم سالدی من زاری بو درده
چوخ چتین قورتولا زهرا بو مرضدن داخی بیرده
اولمارام غصّوه راضی چکرم مطلبه پرده
گوره سن غسل ویرنده، سینمی گورسن عم اوغلی
.
.
اهل دل اولسا بولر حالمی بو اشکِ تریمدن
دردیمون چوخلوقون آنلار آغاران زلف سریمدن
گیدورم آیریلورام زینب خونین جگریمدن
یانورام صبر ایدرم صبریمی مستحسن عم اوغلی
.
.
قیز عیالی آنیه دالدالانار قلبی یانان گون
سیخیلار قیز آنانون قولتوقنا گورسه یامان گون
قیز یتیمی اولسا گیدر عزتی دنیادن همان گون
گیدوریم اهل جفادن دگولم ایمن عم اوغلی
.
.
حقّی وار زینبمون آغلیه بو مطلبه من سیز
کیم یانار برج مصیبتده گزن کوکبه من سیز
سن نوازش قیل آجیخلانما قیزیم زینبه من سیز
من ئولندن صورا سالما قیزیمی گوزدن عم اوغلی
.
.
آغلورام آغلاماقا بوسوزوم عنوان دور عم اوغلی
ایمدیدن زینبیمون حالی پریشان دور عم اوغلی
بوینی چگننده قالوب دیده سی گریان دور عم اوغلی
حقّی وار آغلیه ایمن دگی دشمندن عم اوغلی
.
.
راه حقدن بولورم اهل جفا کج دوراجاق دور
بالامون بادۀ غمدن سینه سین دولدوراجاق دور
معجر اوسته بو قیزیم زینبه قمچی ویراجاق دور
حالنه شیعه «رجائیله» ایدر شیون عم اوغلی
.
.
#فاطمیه #رجایی_تبریزی #فاطمیه_شهادت #ترکی #زبدةالاشعار
نظر دهید