زبانحال حضرت زهرا (س) خطاب جناب زینب (س)
.
.
مرحوم شعاع تبریزی
.
.
فاطمه گر چه ویرور جان آغلاما یازینبا
گوز یاشون بو گل عذاره باغلاما یازینبا
.
.
بو جهان فانیدی بالله یوخ وفاسی زینبیم
خانۀ غمدور بوعالم یوخ بقاسی زینبیم
لیک چوخدور آل طاهایه جفاسی زینبیم
چکمیشم اون سگّز ایل بی حد بلا یازینبا
.
.
وردی اود ثانی جفائیله قاپوم یاندی منیم
ضرب سیلی تازیانه نطقمی آلدی منیم
بیردن آهیم بو جفاده عرشه قوزاندی منیم
من هارا سیلی هارا قمچی هارا یازینبا
.
.
حقّیمی دشمنلریم آلدى الیمدن دینمدیم
حجت اللهه قولوم سندی ولی بولدورمدیم
بو فنا دنیاده بالله شاد اولوب بیر گولمدیم
دخت پیغمبر دگلدوم گوئیا یازینبا
.
.
سینمه مسمار باتدی یاره لندیم آغلادیم
محسنیم سقط اولدی یاندیم بو غمه دل داغلادیم
سالدی طاقتدن منی اشرار دین قان آغلادیم
قامتیم غمدن بوکولدی برملا یازینبا
.
اولمادیم بیر لحظه راحت من جفای دهردن
چوخ مصیبتلر یتوب زهرایه اهل شردن
لیک دوزدوم هر بلایه چکمدیم ال صبردن
سنده صبر ایت گلسه هر گونه بلا یازینبا
.
.
عمرومه ثانی جفاسی ویردی آخر خاتمه
شیونه چوخ گلمه باتما ایمدیدن سن ماتمه
آغلاما آغلار گوزون قربانی اولسون فاطمه
آغلاسان آغلار آنان خیر النساء یازینبا
.
.
گرچه جانانه ویروب جان ترک جانان ایلورم
خار ظلموندن سولوب ترک گلستان ایلورم
بلبل شوریده تک هجرونده افغان ایلورم
بو غمیم بسدور منه سن آغلاما یازینبا
.
.
ایلورم بو وقت رحلتده وصیت من سنه
چوخ ملول اولما قیزیم گلمه بو نوع شیونه
بو فنا دنیا همیشه بزم ماتمدور سنه
چونکه سن سن غمکش آل عبا یازینبا
.
.
گل کناریمده اوتور چوخ ایتمه افغان آغلاما
آغلاما جان اوستیم اولّام پریشان آغلاما
آغلاسان آغلار حسینیله حسن قان آغلاما
اودلانار قلبیم حسینیم آغلاسا یازینبا
.
.
اولمارام راضی عزیزیم مجتبا داده گله
نی کیمی شوره گلوب بو غمده فریاده گله
ایمدیدن قویما حسن دلدن یانوب داده گله
یاندورار چون قلبینی زهر جفا یازینبا
.
.
جان سنون جان بو حسینون جانی قویما آغلاسون
ایمدی ئولّم من حسینی قویما سینه داغلاسون
نور عینیمدور منیم دلدن یانوب اودلانماسون
حالینه یانام اونون صبح ومسا یازینبا
.
.
بیرده ویر کلثوم محزونه تسلّی دمبدم
قویما چوخ دنیاده یوز ویرسون اونا درد و الم
چون شریک درد و محنتدور سنه اول کان غم
شامه تک سنله گیدر اول بینوا یازینبا
.
.
داد او ساعتدن بساط کربلا برپا اولار
تشنه لیقدان گلشنیمده گللریم یکسر سولار
طاقت و صبر و قرارون بو محن الدن آلار
وار قباقدا ماجرای کربلا یازینبا
.
.
گوز یاشون تو کمه عذاره بیله یاندیرما منی
جان ویرن وقتیمده گل جاندان اوساندورما منی
قویما بوینون چگنوه حسرتله یاندیرما منی
حالیوه آغلار سنون عرش خدا یازینبا
.
.
گوز یاشون ساخلا دیار کربلایه آغلاما
دام محنتده دوشرسن مین بلایه آغلاما
عزّتون الدن گیدر یکسر فنایه آغلاما
قولّارون باغلار طنابه اشقیا یازینبا
.
.
قلبیوی تیر غمه غم لشکری آماج ایدر
شامیان جاه جلالون ظلمیله تاراج ایدر
عترت پیغمبری بیر معجره محتاج ایدر
ال آچاندا غارته اهل جفا یازینبا
.
.
اکبر مه پاره نی دوغرار جفائیله عدو
باشنی تشنه کسلّر بیر ایچیم ویرمزله سو
بیر نفر اولماز دین ئولدورمیون ناکامدی بو
اوندا قان آغلار حسینیم برملا یازینبا
.
.
بیر طرفده قاسمون نعشین ایده للر پایمال
بیر طرفده دوغرار عبّاسی گروه بد سکال
قوللارین ایلر قلم سو اوسته قوم کین خصال
العطش سسلر او گون آل عبا یازینبا
.
.
اصغری لب تشنه اوخلار حرمله ایتمز حیا
قان ایدر قلب ربابی بو ستمله اشقیا
داد و آهیله دولار یکسر فضای کربلا
عرشده برپا اولار بزم عزا یازینبا
.
.
سن بلورسن من حسینی جان دلدن ایسترم
قلبمون آرامدی چون سینم اوسته بسلرم
باشنی تشنه کسنده من اوغول وای سسلرم
ظلمده طغیان ایدر شمر دغا یازینبا
.
.
ظلمیله اوز ساربانی جسمدن رختین سویار
پاره پاره پیکرین اهل جفا عریان قویار
بی حیا خولی باشین مطبخده کول اوسته قویار
اوغلوما منزل اولار مطبخ سرا یازینبا
.
.
وار باشندا چوخ بلالر آگهم بولّم اوزوم
کوفیه شام غریبانه او گون گلّم اوزوم
زلفومیله عارضیندن قانینی سیلّم اوزوم
قتلگهده سنده قور بزم عزا یازینبا
.
.
گر چه مدتدور «شعاع» بیمارسن ایتمه نوا
دامن زهرانی دوت دائم سیزیلدا آل دوا
عرض قیل زهرا دیلینجه ای عزیز مرتضا
سنده ایله سائلون لطفاً دعا یازینبا
.
.
#فاطمیه #شعاع_تبریزی #ترکی #زبدةالاشعار #فاطمیه_شهادت
نظر دهید