چکوبله مجلسه قاره عزا عزاسیدی بو #اکبریه_اعظمی_تبریزی

در عزای جوان و شهادت حضرت علی اکبر (ع)
..
..
مرحوم اعظمی تبریزی
..
..
چکوبله مجلسه قاره عزا عزاسیدی بو
گلون فغانه جوانلار جوان عزاسیدی بو
..
..
بو نوجوانه جوانلار قوروبلا مجلس یاس
گیوبله اگنینه دوست و رفیقی قاره لباس
قویوبلا مجلسه تا هرنه واردی غملو اساس
دیولّه تازه جوانون عزا اساسیدی بو
..
..
جوان ئولنده جوانلار اونا دوتالار عزا
دوزَلَّه مجلسه گل عکسنه چکلله قرا
باخوب او عکسه جوانلار ایدلَّه شورونوا
باخان اُو بزمه بولر نوجوان عزاسیدی بو
..
..
یغالّا گوز قباقیندان قالان اساسین اونون
بزلّه گللریله مجلس عزاسین اونون
قویالّا مایۀ غم مجلسه لباسین اونون
دیللَّه خونچادا قویموشلا طوی لباسیدی بو
..
..
هامیه لازم ایدوب حی لا مکان ئولومی
بیری ئولنده ویرر چوخ دله تکان ئولومی
کباب ایدر اورگین باشینی جوان ئولومی
دوشنده سوز دیولر چرخ دون جفاسیدی بو
..
..
جوانین ئولماقی عالمده دللری داغلار
غمینده گر چه هامی گوز یاشی یوزه باغلار
ولی ئولونجه آناسی اوغول دیر آغلار
باخان دیر که یقین درد آشناسیدی بو
..
..
قالار نحالته بلبل گلون خزان گورسه
نئدر اوغولسوز آنا سرو بوستان گورسه
دیر جوان بالاوای هاردا بیر جوان گورسه
صدا گلنده دیر اوغلومون صداسیدی بو
..
..
آنانون ئولسه جوان اوغلی حنجری بیچیلر
اورک آچیلماز ئولنجه ایوینده غم ایچیلر
آنالار ایچره هر اوغلى ئولن آنا سئچیلر
باخان بولر اونا که هجر مبتلاسیدی بو
..
..
نه چکدی اکبر آناسی اوغول فراقینده
نجه اوغول که اؤزی بسلیوب قوجاقینده
بویادی قانینه اعدا گوزی قباقینده
دیردی آغلامارام دین حق فداسیدی بو
..
..
ولی ئولنجه یوزه اشک چشم باغلاردی
گورنده بیر گل نورسته سینه داغلاردی
ایله سیزیلدیوب اوخشاردی ایله آغلاردی
گورن دیردی که اوغلى ئولن نواسیدی بو
..
..
ئولونجه چیخمادی اکبر غمی خیالیندن
هارا گیدنده دیردی اوغول ملالیندن
گورن اونی تانیاردی عزالی حالیندن
دیردی بیر بیرینه اکبرین آناسیدی بو
..
..
سیزیلدار «اعظمی» اکبر آدی گلنده دله
اماندی بوشلاما سن دامنین سالاندا اله
گرکدی دردی اولان نی کیمی نوایه گله
عذاره گوز یاشی توک دردوین دواسیدی بو
..
..
#اکبریه #اعظمی_تبریزی #ختم_خوانی #فرزند #جوان #اکبریه_شهادت #ترکی #زبدةالاشعار